გიორგი კვირიკაშვილი ლინას ლინკევიჩიუსს შეხვდა

2015-09-07 18:52:51, 546 ნახვა

პოლიტიკა

საქართველოს ვიცე პრემიერ-მინისტრი, საგარეო საქმეთა მინისტრი გიორგი კვირიკაშვილი ლიტველ კოლეგას, ლინას ლინკევიჩიუსს
შეხვდა, რომელიც საქართველოს საერთაშორისო კონფერენციაში „ევროპის ახალი გეოპოლიტიკური ლანდშაფტი“ მონაწილეობის მისაღებად ესტუმრა.
შეხვედრაზე ლიტვის საგარეო საქმეთა მინისტრმა გიორგი კვირიკაშვილს ახალ თანამდებობაზე დანიშვნა მიულოცა და მომავალ საქმიანობაში წარმატებები უსურვა.
ამავე დროს, მან კიდევ ერთხელ დაადასტურა ლიტვის მზადყოფნა, კვლავ გააგრძელოს საქართველოს სუვერენიტეტისა და ტერიტორიული მთლიანობის, ევროპული და ევრო-ატლანტიკური ინტეგრაციის მხარდაჭერა. თავის მხრივ, გიორგი კვირიკაშვილმა აღნიშნა, რომ საქართველოს ძალზედ აფასებს მეგობარი ქვეყნის ძალისხმევას როგორც საერთაშორისო ასპარეზზე, ისე ქვეყნის შიგნით მიმდინარე რეფორმების პროცესში საექსპერტო-ტექნიკურ დახმარებას სხვადასხვა აქტუალურ სფეროში.
შეხვედრაზე ასევე ისაუბრეს მომავალი მაღალი დონის ვიზიტების შესახებ. განსაკუთრებით ხაზი გაესვა ორ ქვეყანას შორის სავაჭრო-ეკონომიკური თანამშრომლობის განვითარების მნიშვნელობას. აღინიშნა, რომ ვილნიუსში დაგეგმილი მთავრობათაშორისი ეკონომიკური კომისიის პირველი სხდომა არის კარგი შესაძლებლობა, რათა კიდევ ერთხელ შეფასდეს ამ მიმართულებით არსებული პროგრესი და გამოიკვეთოს თანამშრომლობის აქტუალური სფეროები.
ვიზიტის ფარგლებში ლიტვის საგარეო საქმეთა მინისტრი შეხვდება საქართველოს პრეზიდენტ გიორგი მარგველაშვილს და პრემიერ-მინისტრ ირაკლი ღარიბაშვილს.