ინტერნეტიზაციის პროექტის ფარგლებში პირველი საპილოტე რეგიონი ოზურგეთი იქნება, სადაც ქსელის მშენებლობა უახლოეს პერიოდში დაიწყება

2020-07-23 14:04:35, 3179 ნახვა

ეკონომიკა

„რამდენიმე თვეში ოზურგეთის 49 დასახლებული პუნქტი, სადაც 8 500 ოჯახზე მეტი ცხოვრობს, მაღალი ხარისხის, სწრაფ ინტერნეტს ოპტიკურ-ბოჭკოვანი ქსელით მიიღებს, რომლის მშენებლობაც უახლოეს პერიოდში დაიწყება", - ამის შესახებ ნათია თურნავამ მთავრობის სხდომის დასრულების შემდეგ გამართულ ბრიფინგზე განაცხადა. მინისტრის თქმით, ოზურგეთის მუნიციპალიტეტში ფართოზოლოვანი ინტერნეტ-ინფრასტრუქტურის მშენებლობა მიმდინარე წლის ბოლომდე უნდა დასრულდეს.

„მიღებულია გადაწყვეტილება და ვიწყებთ პირველ საპილოტე პროექტს ოზურგეთის მუნიციპალიტეტში, რომელიც ეკონომიკის სამინისტროს კონტროლის ქვეშ, ძალიან სწრაფად დასრულდება და შემდეგ გაგრძელდება უკვე საქართველოს დანარჩენ რეგიონებში. ფართოზოლოვანი ოპტიკურ-ბოჭკოვანი ინტერნეტ-ინფრასტრუქტურის შექმნა არის ძალიან მასშტაბური პროექტი, რომელიც მთელი საქართველოს მასშტაბით, „ოუფენ ნეტის" მიერ განხორციელდება და 1000-მდე დასახლებულ პუნქტს მოიცავს", - აღნიშნა მინისტრმა.

ნათია თურნავას თქმით, კორონავირუსთან დაკავშირებული გამოწვევების ფონზე ძალიან მნიშვნელოვანია, ქვეყანა კიდევ უფრო მეტად გადაეწყოს ციფრული ურთიერთობების პლატფორმაზე და გახდეს უფრო მეტად ინტერნეტიზირებული. „უფრო მეტად უნდა შემოვიდეს ელექტრონული სერვისები, რაც ძალიან მნიშვნელოვანია განათლების სფეროსთვის, ბიზნესისთვის, მათ შორის მცირე ბიზნესისთვის, სასტუმროებისთვის, რომლებსაც შეეძლებათ განათავსონ თავიანთი შეთავაზებები ინტერნეტში, ასევე „ფრილანსერებისთვის" - ადამიანებისთვის, რომლებიც დისტანციურად დასაქმდებიან და შეასრულებენ სხვადასხვა ტიპის სერვისებს ინტერნეტის მეშვეობით", - განაცხადა ნათია თურნავამ.

ფართოზოლოვანი ინფრასტრუქტურის განვითარება არის საქართველოს ხელისუფლების უმნიშვნელოვანესი ინიციატივა, რომელიც საშუალებას იძლევა, სამშენებლო არეალში არსებული დასახლებული პუნქტები, სადაც ოპტიკურ-ბოჭკოვანი ინფრასტრუქტურა კერძო ოპერატორების მიერ არ არის მიყვანილი, სრულყოფილად დაიფაროს ოპტიკურ-ბოჭკოვანი მაგისტრალებით, რათა ხელი შეეწყოს ადგილობრივი ოპერატორების მიერ საცალო ქსელის განვითარებას და ინტერნეტის აბონენტებამდე მიყვანას.

პროექტი ასევე იძლევა სხვა ისეთ ფართოზოლოვან მომსახურებებთან წვდომის შესაძლებლობას, როგორებიცაა: ელექტრონული ჯანდაცვა, ელექტრონული განათლება, ელექტრონული მმართველობა, ელექტრონული კომერცია და სხვა თანამედროვე სერვისები — ნებისმიერ რეგიონში, სადაც აქამდე მსგავსი მომსახურება არ ყოფილა.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),