უკრაინის დამოუკიდებლობის დღესთან დაკავშირებით წეროვანის დაშავებულ სამხედრო მოსამსახურეთა რეაბილიტაციის ცენტრს საქართველოს თავდაცვის მინისტრი თინათინ ხიდაშელი, საქართველოში უკრაინის ელჩის მოვალეობის შემსრულებელი გეორგი ნაზარევი და უკრაინის სამხედრო ატაშე სერგეი კუნდიუსი ეწვივნენ. 
როგორც „ექსპრესნიუსს“ თავდაცვის სამინისტროდან აცნობეს, ხიდაშელმა, უკრაინის ელჩმა და უკრაინის სამხედრო ატაშემ ის უკრაინელი ჯარისკაცები მოინახულეს, რომლებიც წეროვანში რეაბილიტაციას გადიან. 
უწყების ინფორმაციით, სტუმრებმა ცენტრის ინფრასტრუქტურა დაათვალიერეს და იქ არსებულ პირობებს გაეცნენ.
თინათინ ხიდაშელმა უკრაინელ ხალხს დამოუკიდებლობის დღე მიულოცა და ქართულ სამკურნალო დაწესებულებაში უკრაინელი ჯარისკაცების რეაბილიტაციის საკითხზეც ისაუბრა.
„დღეს უკრაინის დამოუკიდებლობის დღეა. დღევანდელი დღე მინდა მივულოცო უკრაინელ ხალხს. მათი გამარჯვება ჩვენიც და, საერთოდ, დამოუკიდებლობისა და თავისუფლებისთვის ბრძოლაში გამარჯვებაა. უკრაინის ხელისუფლებასთან სხვადასხვა ჰუმანიტარულ პროექტებში ვთანამშრომლობთ. ამჟამად, ჩვენს სამკურნალო დაწესებულებებში უკრაინელი ახალგაზრდები გადიან რეაბილიტაციას. მზად ვართ, აღმოვუჩინოთ ყველანაირი დახმარება, რაც კი შეგვიძლია. ვფიქრობთ, რომ ასეთი ტიპის ჰუმანიტარულ პროექტები ხელმისაწვდომი უნდა იყოს ყველასთვის, ვისაც სჭირდება - საზღვრების მიუხედავად“, - განაცხადა თინათინ ხიდაშელმა. 
გეორგი ნაზარევმა კი დაშავებული უკრაინელი სამხედრო მოსამსახურეების მიმართ გამოჩენილი ყურადღებისთვის საქართველოს მთავრობასა და საქართველოს თავდაცვის სამინისტროს მადლობა გადაუხადა. 

„დღეს უკრაინა დამოუკიდებლობის 24-ე წლისთავს აღნიშნავს. ამ დღესთან დაკავშირებით უკრაინის საელჩოს სახელით მოვედით იმ ჯარისკაცების მოსანახულებლად, რომლებიც საქართველოს მთავრობამ, საქართველოს თავდაცვის სამინისტრომ გულითადად მიიღეს და მათი თანადგომით წეროვანში რეაბილიტაციის კურსს გადიან“, - განცხადა საქართველოში უკრაინის ელჩის მოვალეობის შემსრულებელმა.
წეროვანის დაშავებულ სამხედრო მოსამსახურეთა რეაბილიტაციის ცენტრში შვიდი უკრაინელი სამხედრო მოსამსახურე მკურნალობს. ისინი საქართველოში რეაბილიტაციის კურსს საქართველო-უკრაინას შორის 2015 წლის 28 აპრილს გაფორმებული მემორანდუმის თანახმად გადიან. 

სარეაბილიტაციო ცენტრში სამხედრო მოსამსახურეთა სამედიცინო უზრუნველყოფის მიზნით ფიზიკური თერაპევტი, ოკუპაციური თერაპევტი, სამი ექთანი და ერთი ექიმი მუშაობს. რეაბილიტაციის კურსის ფარგლებში იგეგმება ჯარისკაცთათვის თბილისის, მცხეთისა და სიღნაღის დათვალიერება. სარეაბილიტაციო კურსი 20 აგვისტოს დაიწყო და 3 სექტემბერს დასრულდება. უკრაინული მხარის სურვილის შემთხევაში, საქართველოში სარეაბილიტაციო კურსს სხვა უკრაინელი სამხედრო მოსამსახურეებიც გაივლიან.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

The Economist - უკრაინამ სამი წლის განმავლობაში პირველად აიღო ინიციატივა ფრონტის ხაზზე

ზურაბიშვილმა ახალ პატრიარქს მოუწოდა, შეიწყალოს ყველა სინდისის პატიმარი

„რეალური მოლაპარაკებები აღარ მიმდინარეობს“ - უკრაინა ემზადება ომის გასაგრძელებლად აშშ-ის დახმარების გარეშე

პატრიარქმა კირილმა შიო III-ს მშვიდობიანი და კურთხეული პატრიარქობა უსურვა