გავრცელებული ინფორმაცია, რომ ფსიქოტროპული მედიკამენტების ინტოქსიკაციით მაღალი ტექნოლოგიების საუნივერსიტეტო კლინიკაში თვეში 100-120 პაციენტი შედის,  სიმართლეს არ შეესაბამება, - ამის შესახებ შრომის, ჯანმრთელობისა და სოციალური დაცვის მინისტრმა დავით სერგეენკომ, მთავრობის სხდომის დასრულების შემდეგ ჟურანლისტებს განუცხადა.

მისი თქმით, ინფორმაციის გადამოწმების შედეგად, აღმოჩნდა, რომ აღნიშნულ კლინიკაში ბოლო თვეში არა 100 ან 120, არამედ 16 პაციენტია შესული.

„ინფორმაცია, რომელიც გუშინწინდელი დღიდან ვრცელდება მედიაში, რომ კლინიკებში გაზრდილია მიმართვიანობა, კერძოდ მაღალი ტექნოლოგიების საუნივერსიტეტო კლინიკაში თვეში 100-120 პაციენტი შედის, გუშინ, დღის განმავლობაში დეტალურად, თითოეული სამედიცინო ჩანაწერის დონეზე გავაანალიზეთ. აღმოჩნდა, რომ არა 100 ან 120 თვეში, არამედ ამ კლინიკაში ბოლო თვეში სულ 16 პაციენტია შესული. მედია საშუალებებში იყო გავრცელებული ინფორმაცია, რომ მათგან ნახევარზე მეტს ხელოვნური სუნთქვა სჭირდება. საბედნიეროდ, ამ 16 პაციენტიდან მხოლოდ 2-ს დასჭირდა ხანმოკლე მექანიკური ვენტილაცია, ანუ ხელოვნური სუნთქვა“, - განაცხადა სერგეენკომ.

ამასთან, როგორც მინისტრმა აღნიშნა, ექსპერტების აზრი, რომლებიც ამბობენ, რომ ფსიქოტროპული მედიკამენტებით ინტოქსიკაციის ფაქტებმა მოიმატა, მედიაში გავრცელებლ ინფორმაციაზეა დაფუძნებული.

მისივე თქმით, სამინისტრო დეტალურად გაერკვევა, კლინიკების წარმომადგენლებმა მხოლოდ ნუმეროლოგიური ხარვეზების გამო გაავრცელეს აღნიშნული ინფორმაცია, თუ რაიმე სხვა მოსაზრებით.

„ექსპერტების აზრი, რომლებიც ამბობენ რომ მოიმატა, დაფუძნებული იყო იმ მონაცემებს რაც მათ წაიკითხეს მედიიდან. თვეში 100-120 არ ყოფილა, ამ კლინიკაში იყო 16. რამ გამოიწვია ციფრებში ასეთი ცდომა, ამბობენ 100-120 და რეალურად არის 16, გამომდინარე საზოგადოების მაღალი ინტერესიდან, მე ვთვლი, რომ ჯანდაცვის სამინისტრო ვალდებულია დეტალურად გაერკვიოს, ამ კლინიკების წარმომადგენლებმა მხოლოდ ნუმეროლოგიური ხარვეზების გამო გაავრცელეს ეს ინფორმაცია, თუ რაიმე სხვა მოსაზრებით. ამის პირობას გაძლევთ, რომ ამას დეტალურად, გამჭვირვალედ და ობიექტურად შევისწავლით“, - განაცხადა დავით სერგეენკომ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

უკრაინელების მოკლული გენერალ-მაიორი ანტონ გრუნისი, საქართველოს წინააღმდეგ 2008 წელს ომობდა

იემენელი ჰუსიტები მუსლიმებისთვის წმინდა ქალაქს მექას დაესხნენ თავს

SOLO-ს განსაკუთრებული შეთავაზება ისთ ფოინთის დაბადების დღეს SOLO VISA ბარათის მფლობელებს

ახალი შეთავაზება TBC-ის პლატფორმაზე - დაიბრუნე ვაჭრობის საკომისიო და დასაჩუქრდი $500-მდე