გროზნოს ქუჩაზე სკვერი საზეიმოდ გაიხსნა

2019-10-16 10:22:17, 738 ნახვა

საზოგადოება

ჩუღურეთის რაიონში, გროზნოს ქუჩაზე, 3 200 კვადრატულ მეტრზე, თანამედროვე სტანდარტებით აღჭურვილი მრავალფუნქციური დასასვენებელი სივრცე მოეწყო. რეაბილიტირებული სკვერის საზეიმო გახსნას დედაქალაქის მერი , კახა კალაძე დაესწრო.

აღნიშნულ ტერიტორიაზე, რომელიც ნაგავსაყრელად იყო ქცეული, საბავშვო ზონა, სპორტული მოედანი, გარე განათების სისტემა, საფეხმავლო და ველობილიკები მოეწყო. გარდა ამისა, განთავსდა საბაღე სკამები, ტრიბუნები და საჩრდილობლები. ტერიტორია აღიჭურვა ყველა საჭირო ინვენტარით.

თბილისის მერის კახა კალაძის განცხადებით, თბილისის მერიის პრიორიტეტი მუნიციპალიტეტში ბევრი მწვანე სივრცის შექმნაა.

„აქ ძალიან მძიმე მდგომარეობა იყო და დღეს ნახეთ როგორი ლამაზი პროექტი გამოვიდა თავისი საფეხბურთო მოედნით, დასასვენებელი ადგილებით, ახალი გამწვანებით და ხე-ნარგავებით. ყველაზე მთავარი ის არის, რომ ადგილობრივი მოსახლეობა კმაყოფილია. ზუსტად ეს არის მნიშვნელოვანი, ჩვენი მიდგომაა, რომ ყველა რაიონში, რაც შეიძლება მეტი მწვანე სივრცე შევქნათ“,- განაცხადა კახა კალაძემ.

პროექტის თანახმად, დასასვენებელი სივრცე უსაფრთხოების მოაჯირით შემოიფარგლა, ჩატარდა გამწვანების სამუშაოები და მოიხატა სკვერში არსებული კედლები. კედლის მოხატვის ბოლო ეტაპის სამუშაოებში მონაწილეობა პროფესიონალ მხატვრებთან ერთად, მოწვეულმა სტუმრებმაც მიიღეს.

სკვერის გახსნასთან დაკავშირებით, წარმოდგენილი იყო საბავშვო გასართობი პროგრამა, რომლის ფარგლებშიც, ბავშვებისთვის საპნის ბუშტების, აზოტისა და ცეცხლოვანი შოუ მოეწყო. ასევე, გაიმართა თბილისის მერიის „ბიგ ბენდის“ კონცერტი. ღონისძიება გრანდიოზული ფოიერვერკით დასრულდა.

ჩუღურეთის რაიონის გამგეობის დაკვეთით, სამუშაოები შპს „არბამ“ შეასრულა. პროექტის ღირებულებამ 503 330 ლარი შეადგინა.

(NS)

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,