ხელნაწერთა ეროვნულ ცენტრს კორნელი კეკელიძის სახელი დაუბრუნდება, 30 ივნისი კი ხელნაწერის დღედ დაწესდება.

აღნიშნული გადაწყვეტილება პრემიერ–მინისტრ ირაკლი ღარიბაშვილის  განათლებისა და მეცნიერების მინისტრ თამარ სანიკიძესთან და ხელნაწერთა ეროვნული ცენტრის დირექტორთან, ზაზა აბაშიძესთან შეხვედრაზე მიიღეს.
მთავრობის ადმინისტრაციის ინფორმაციით, შეხვედრაზე ხელნაწერთა ეროვნული ცენტრის რეორგანიზაციის სქემა განიხილეს, რაც  ახალ დებულებას, გაზრდილ სახელფასო განაკვეთებს და სტრუქტურულ საშტატო განრიგს მოიცავს. ასევე საუბარი შეეხო ცენტრისთვის შენობის გამოყოფის საკითხს.  პრემიერმა მოიწონა წინადადება, ყოფილი ეროვნული ბანკის შენობაში ხელნაწერთა ცენტრის განთავსებასთან დაკავშირებით.
„დღეს პრემიერ–მინისტრს  წარმოვუდგინეთ რეორგანიზების გეგმა, ახალი დებულებით, გაზრდილი სახელფასო განაკვეთებით და სტრუქტურული საშტატო განრიგით, რაც მისასალმებელია. ეს ხელს შეუწყობს ინსტიტუტის გამართულ და ორგანიზებულ მუშაობას. გამოვედით ინიციატივით, რომ ხელნაწერთა ეროვნულ ცენტრს დაუბრუნდეს კორნელი კეკელიძის სახელი. დღეს გახლავთ ხელნაწერთა ეროვნულ ცენტრის იუბილე და გამოვდივართ ინიციატივით, რომ 30 ივნისი დაწესდეს ხელნაწერების დღე და მოგვეცემა საშუალება საზოგადოებასთან ერთად აღვნიშნოთ ეს დღესასწაული,“–განაცხადა თამარ სანიკიძემ შეხვედრის დასრულების შემდეგ.
ხელნაწერთა ეროვნული ცენტრის დირექტორის, ზაზა აბაშიძის განმარტებით, პრემიერ–მინისტრს ის პრობლემური საკითხები გააცნო, რომლებიც  ყველაზე მეტად აწუხებს თანამშრომლებს.
„ყველაზე პრობლემური არის შენობის საკითხი. ჩვენ შევთავაზეთ რამდენიმე ვარიანტი, თუმცა ყველაზე მეტად პრემიერის მოწონება დაიმსახურა წინადადებამ, ხელნაწერთა ეროვნული ცენტრი განთავსდეს ყოფილი ეროვნული ბანკის ისტორიულ შენობაში. არ მგონია, ვინმე შეეწინააღმდეგოს ამ აზრს, რომ ხელნაწერთა ასეთი მნიშვნელოვანი ინსტიტუცია განთავსდეს  უნიკალურ შენობაში. კიდევ ერთი საკითხი შევაჯერეთ–შეიქმნება ხელნაწერთა დაცვის სახელმწიფო ფონდი. სახელმწიფო იქნება მისი ფუძემდებელი და ეს ფონდი მოახდენს აკუმულირებას თანხების, რათა მომავალში ჩვენ დამოუკიდებლად შევძლოთ ხელნაწერთა შენარჩუნება, მათი შესწავლა და გამოცემა,“–აღნიშნა ზაზა აბაშიძემ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ევროკავშირმა დაგმო ირანში რეპრესიები და სიკვდილით დასჯა

ტრამპი ევროპას - ჩვენ მხოლოდ უნდა ვთქვათ: „იცით რა? ჩვენ აღარ ვვაჭრობთ თქვენთან

კონგრესმა მიიღო კანონპროექტი ჯოჯოხეთური სანქციები“ რუსეთის წინააღმდეგ „ და დოკუმენტი ხელმოსაწერად ტრამპს გაუგზავნა

უკრაინელების მოკლული გენერალ-მაიორი ანტონ გრუნისი, საქართველოს წინააღმდეგ 2008 წელს ომობდა