დედაქალაქის მერი კახა კალაძე, მოადგილე ირაკლი ბენდელიანთან ერთად, ვახუშტის ხიდის რეაბილიტაციის პროცესს გაეცნო. 

როგორც კალაძემ განაცხადა, ვახუშტის ხიდის ავარიულობის ხარისხი 2015 წელს, თბილისის მერიის მიერ განხორციელებული ხიდების კვლევის მიხედვით დადგინდა.

„ვახუშტის  ხიდი აშენებულია 1974-1976 წელს და მას შემდეგ არავითარი რეაბილიტაცია არ ჩატარებულა. 2015-2016 წლებში ჩატარდა მთელი ქალაქის მასშტაბით არსებული ხიდების კვლევა, მათი მდგომარეობის შესწავლის მიზნით. ავარიულობის მიხედვით განისაზღვრა პრიორიტეტები, თუ რომელი ხიდი უნდა გაკეთდეს პირველ რიგში. ეს ხიდი იყო ისეთ მდგომარეობაში, რომ აუცილებლად და სასწრაფოდ საჭიროებდა რეაბილიტაციას. მთლიანად შეიცვლება საყრდენები, ასევე, მოწესრიგდება ინფრასტრუქტურა, - განათების ბოძები და მოაჯირები. სამუშაოები, დაახლოებით,  ხუთ თვეში დასრულდება“, - განაცხადა კახა კალაძემ. 

თბილისის მერიის ინფრასტრუქტურის განვითარების საქალაქო სამსახურმა ხიდის სარეკონსტრუქციო სამუშაოები 27 იანვრიდან დაიწყო. 

პროექტის ფარგლებში, ახალი კონსტრუქციის, სავალი ნაწილის, სადეფორმაციო ნაკერებისა და რკინა-ბეტონის თვალამრიდების მოწყობაა გათვალისწინებული. ასევე, გარე განათების ქსელის, ხიდთან მისასვლელი სანიაღვრე ჭების, დაზიანებული კედლების რეაბილიტაცია და სანაპირო ბურჯების დანაგვიანებული შიდა სივრცის დასუფთავება.

სამუშაოებიდან გამომდინარე ვახუშტის ხიდზე მოძრაობა ცალმხრივად შეიზღუდა. ავტოტრანსპორტისთვის გადაადგილება შესაძლებელია მხოლოდ ვახუშტის ხიდიდან სააკაძის მოედნის მიმართულებით. დროებით შეიცვალა ხიდზე მოძრავი საზოგადოებრივი ტრანსპორტის მარშრუტებიც: N51 ავტობუსი და მიკროავტობუსები სააკაძის დაღმართიდან მტკვრის მარჯვენა სანაპიროს დაუკავშირდებიან, „ლაგუნა ვერესთან“ გმირთა მოედნისკენ აუხვევენ, გაივლიან ცირკის მიმდებარე ტერიტორიას, გადაკვეთენ თამარ მეფის ხიდს, რის შემდეგაც, მოძრაობას დადგენილი სქემით განაგრძობენ.

სარეაბილიტაციო სამუშაოებს ტენდერში გამარჯვებული კომპანია „კავკასუს როუდ პროჯექტი“ ახორციელებს. პროექტის განხორციელებაზე დედაქალაქის ბიუჯეტიდან   2 394 434 ლარი დაიხარჯება.  
 
ვახუშტის ხიდის სარეაბილიტაციო სამუშაოების მიმდინარეობას, მერთან ერთად, ინფრასტრუქტურის განვითარების სამსახურის უფროსი გალაქტიონ ბუაძე, დიდუბის რაიონის გამგებელი ირმა ზავრადაშვილი, საბურთალოს რაიონის გამგებელი გაიოზ ვასაძე, ასევე, საკრებულოს მაჟორიტარი დეპუტატები გაეცნენ. 

(NS)

ავტორი: ,

სოციალური ქსელები

ქრისტიანობის 1700 წლისთავის აღსანიშნავად გაიხსნა სიმპოზიუმი სახელწოდებით „ღმერთი, სამშობლო, ადამიანი“

ტრამპის პარტიაში მკაცრად აკრიტიკებენ მის გამონათქვამებს ზელენსკიზე

რუსეთი საქართველოს კვლავ მოუწოდებს ოკუპირებული ტერიტორიების ე.წ საზღვრების დემარკაციისკენ

რეზო კიკნაძე - ციხემ დედაჩემის და ორი ყველაზე ახლობლის ნომერი დაბლოკა - ბოლო ორი თვე ზარების გარეშე დამტოვეს