|
2018-10-19 20:45:24, 2805 ნახვა
ეკონომიკა
გერმანიაში ქართველ მენეჯერთა კვალიფიკაციის ამაღლების პროგრამა გაგრძელდება
გერმანიაში ქართველ მენეჯერთა კვალიფიკაციის ამაღლების სატრენინგო პროგრამა გაგრძელდება. შესაბამის განზრახვათა ერთობლივ დეკლარაციას ხელი გერმანიაში საქართველოს ეკონომიკისა და მდგრადი განვითარების მინისტრის მოადგილის, გენადი არველაძის ვიზიტისას მოეწერა. „ქართველ მენეჯერთა კვალიფიკაციის ასამაღლებელ ტრენინგთან დაკავშირებით, გერმანიის ფედერაციული რესპუბლიკის ეკონომიკისა და ენერგეტიკის ფედერალური სამინისტროსა და საქართველოს ეკონომიკისა და მდგრადი განვითარების სამინისტროს თანამშრომლობის გაგრძელების შესახებ განზრახვის ერთობლივი დეკლარაციას" ასევე ხელი მოაწერა გერმანიის ეკონომიკისა და ენერგეტიკის სამინისტროს საპარლამენტო სახელმწიფო მდივანმა ტომას ბარაისმა. ეკონომიკის სამინისტროს ინფორმაციით, პროგრამის მიზანია კერძო სექტორის შესაძლებლობების განვითარება და ექსპორტის ხელშეწყობა, განსაკუთრებით მცირე და საშუალო ბიზნესისთვის. აღნიშნული კურსი ხელს შეუწყობს ევროკავშირთან ღრმა და ყოვლისმომცველი თავისუფალი სავაჭრო სივრცის შეთანხმების (DCFTA) ფარგლებში ვაჭრობის განვითარებას საქართველოსა და ევროკავშირს შორის. ამასთან, მოამზადებს მენეჯერებს, რომლებიც უფრო წარმატებით შეძლებენ ქართული პროდუქციის გატანას ევროკავშირის და მსოფლიო სხვა ბაზრებზე. აღსანიშნავია, რომ მენეჯერთა გადამზადების პროგრამით ბოლო სამი წლის განმავლობაში 56-მა მენეჯერმა გაიარა აღნიშნული ტრენინგი. დეკლარაციაზე ხელმოწერამდე გენადი არველაძისა და ტომას ბარაისს შორის შეხვედრა გაიმართა, რომლის დროსაც მხარეებმა ორმხრივი ეკონომიკური თანამშრომლობის ძირითადი მიმართულებები და აქტუალური საკითხები განიხილეს. შეხვედრაზე ასევე გამახვილდა ყურადღება საქართველოში გერმანიის კანცლერის ანგელა მერკელის ვიზიტისას მიღწეულ ეკონომიკური შინაარსის შეთანხმებებზე და მათი განხორციელების მნიშვნელობაზე. მათ შორის, ხაზი გაესვა აღნიშნული ვიზიტის დროს საქართველოსა და გერმანიის პირველი პირების მიერ მიღებულ გადაწყვეტილებაზე, რომელიც ითვალისწინებს ყოველწლიურად ერთობლივი სამუშაო ჯგუფების შეხვედრას, რომელიც ეკონომიკის სამინისტროებს შორის მუდმივი დიალოგის ჩარჩო-ფორმატის ჩამოყალიბების საშუალებას იძლევა. აღინიშნა, რომ 2019 წლის პირველ კვარტალში აღნიშნული ინიციატივის ფარგლებში, საქართველოს გერმანიის ეკონომიკური თანამშრომლობისა და განვითარების სამინისტროს დელეგაცია ბიზნესმენთა წარმომადგენლობით ჯგუფთან ერთად ეწვევა. შეხვედრას ასევე დაესწრო საქართველოს ელჩი გერმანიის ფედერაციულ რესპუბლიკაში ელგუჯა ხოკრიშვილი.
(NS)
35 წლის შემდეგ პირველად, შეერთებულმა შტატებმა ახალი ბირთვული ბომბის შემუშავების გადაწყვეტილება მიიღო
რუსეთის თავდაცვის სამინისტრომ კემეროვოს რეგიონში An-12-ის ჩამოვარდნის შედეგად 19 ადამიანის დაღუპვის შესახებ განაცხადა
ქართველი პოეტი, მსახიობი, რეჟისორი საშა გველესიანი 58 წლის ასაკში გარდაიცვალა
მანილაში ტრამპის საწინააღმდეგო საპროტესტო აქციები: პოლიციამ ასეანის სამიტის წინ თითქმის 300 ადამიანი დააკავა
|
რედაქტორის რჩევით
საკონსტიტუციო სასამართლოს მოსამართლეთა აღვირახსნილობა, რომელსაც ვეღარ მალავენ
„ტექნიკური ოპტიმიზაცია“ თუ გასაჩივრების უფლების გაუქმება - რას უშვება ივანიშვილის რეჟიმი საარჩევნო კოდექსს
ომი უკრაინაში
რესპუბლიკელების მთავარი მოწინააღმდეგე, კალიფორნიის გუბერნატორი უკრაინას ეწვია და დახმარება გამოაცხადა
უკრაინამ ყირიმის ხიდს შეუტია
ვიდეო/LIVE პატრიარქის ილია მეორის დაკრძალვა - პირდაპირი
„ტექნიკური ოპტიმიზაცია“ თუ გასაჩივრების უფლების გაუქმება - რას უშვება ივანიშვილის რეჟიმი საარჩევნო კოდექსს
მთავარი თემა
|





