„ქართუ ბანკი“ თავის დროზე იმისთვის გავხსენი, რომ ისევ ამ სისტემას დავხმარებოდი, რამეთუ ვიცი, რომ ქვეყანაში საბანკო სისტემა აუცილებლად უნდა იყოს, თორემ ეკონომიკა ისე ვერ განვითარდება, – განაცხადა პარტია „ქართული ოცნების“ თავმჯდომარემ, ბიძინა ივანიშვილმა პირველი არხის გადაცემაში „აქტუალური თემა მაკა ცინცაძესთან ერთად“ სტუმრობისას.

„ქართუ ბანკი“ არ შედის იმ ბანკების რიცხვში, როგორიცაა „საქართველოს ბანკი“ და „თიბისი ბანკი“, რომლებიც ყველაზე რენტაბელური ბანკები არიან. მე დღესაც ამას ვამბობ, რომ ქვეყანაში საბანკო სისტემა აუცილებლად უნდა იყოს, თორემ ეკონომიკა ისე ვერ განვითარდება და ვინმეს ცდუნება არ გაუჩნდეს, რომ მე „საქართველოს ბანკის“, ან „თიბისი ბანკის“ წინააღმდეგი ვარ. თუ რამეში დავჭირდები, დღესაც მზად ვარ, მათ დავეხმარო. მე ყველაფერს გავაკეთებ, მაგრამ მთელი საქართველო ბანკის ვალებში რომ არ ჩაიძიროს, ეს პროცესი თავისთავად დასარეგულირებელია და ამის ვალდებულება სახელმწიფოს აქვს. ერთი მეორეს არ ეწინააღმდეგება“, – განაცხადა ბიძინა ივანიშვილმა.

როგორც ივანიშვილმა აღნიშნა, კარგია, რომ ქვეყანაში ორი დიდი ბანკი არსებობს, მაგრამ უნდა, მესამე ბანკიც გაჩნდეს, რადგან ორი ბანკი ცოტაა და უფრო მეტია საჭირო იმისთვის, რომ ეკონომიკაში მონოპოლიზების, ან სხვა საფრთხეები არ გაჩნდეს.

ბიძინა ივანიშვილმა ოპონენტებს მოუწოდა, „ქართუ ბანკში“ მივიდნენ და შეამოწმონ, ის ამ ბანკით მდიდრდება, თუ არა.

„მოვიდნენ და შეამოწმონ, რომ ბანკის რენტაბელობა ნორმის ქვემოთ არის. „ქართუ ბანკში“ 200 მილიონ დოლარამდე მაქვს შემოტანილი და დღეს ბანკის კაპიტალი 200 მილიონ დოლარზე ნაკლებია. რომ არ იფიქრონ, მე „ქართუ ბანკით“ ვმდიდრდები, რასაც უპასუხისმგებლო პოლიტიკოსები ხშირად აცხადებენ, მოვიდნენ და შეამოწმონ“, – განაცხადა ბიძინა ივანიშვილმა.

მისი თქმით, ეკონომიკას და დემოკრატიას შორის დისბალანსი ძალიან სახიფათოა და ამას მოფერება, დაჭერა და კბილებით მიტანა უნდა იმ დრომდე, როცა სახელმწიფოს მდგრადობა მოწყვლადი აღარ გახდება.

„მე გარკვეული როლი მაქვს, რასაც ოპოზიცია დაჟინებით არტყამს, ამახინჯებს და ცრუობს. ისინი ამბობენ, რომ ფულს ვაკეთებ და საზოგადოებას ვძარცვავ. სინამდვილეში კი, პირიქით, საერთო საქმეს, ყველაფერს ჩემი კერძო ფულით ვაკეთებ. ეს ჩემმა გუნდმაც უნდა შეიმეცნოს და პროცესებში ჩაერიოს. თუ გნებავთ, ჩემ მიმართ ყველა ბრალდება ინტერნეტში დავდოთ და მე თითოეულს გავცემ პასუხს. მოვიდნენ და კომისია, ან ჯგუფი შექმნან, მაგრამ გარწმუნებთ, ვერც ერთ ნიუანსს ვერ ნახავენ იმისგან განსხვავებულს, რასაც ვაფიქსირებ“, – განაცხადა ბიძინა ივანიშვილმა.

ავტორი: ,

სოციალური ქსელები

NYT: აშშ-სა და რუსეთს შორის უკრაინასთან დაკავშირებული მოლაპარაკებები ლუკოილის აქტივების მრავალმილიარდიანი გარიგების საგანია

საფრანგეთში სკოლებში გამართული საპროტესტო აქციები ქუჩის არეულობაში გადაიზარდა, ერთ კვირაში 5000-ზე მეტი ადამიანი დააკავეს

გორდულაძე პატიმრის განცხადებაზე გაუპატიურების შესახებ - ეს გავს მიზანმიმართულ კამპანიას პენიტენციური სისტემის რეპუტაციის, ქართული ოცნების და სახელმწიფო სისტემის დასაზიანებლად

ელენე ხოშტარია - სისტემა კლავს, სისტემა რყვნის, სისტემა უნდა დაემხოს