ზურაბ პატარაძემ ღვაწლმოსილ პედაგოგებს დედის დღე მიულოცა

2018-03-03 16:02:40, 852 ნახვა

რეგიონი

3 მარტს, დედის დღესთან დაკავშირებით, აჭარის ა.რ. მთავრობის თავმჯდომარე ზურაბ პატარაძე მეუღლესთან ერთად მაღალმთიან აჭარას სტუმრობდა.

აჭარის მთავრობის პრესსამსახურის ინფორმაციით, რეგიონის ხელმძღვანელმა ქედაში და შუახევში მცხოვრები მრავალშვილიანი პედაგოგი დედები, მეხფულე ცეცხლაძე და ცისანა აბუსერიძე მოინახულა და გაწეული პედაგოგიური მოღვაწეობისთვის მადლობა გადაუხადა.

,,ყველა დედას მინდა მივულოცო დღევანდელი დღესასწაული - დედის დღე! ვუსურვებ მათ ჯანმრთელობას, სიკეთეს, წარმატებებს. დღეს ჩვენ ვსტუმრობთ მაღალმთიან აჭარას. დედის დღე მივულოცეთ ღვაწლმოსილ და მრავალშვილიან პედაგოგ დედებს, რომლებიც მრავალი წლის მანძილზე ეწეოდნენ პედაგოგიურ მოღვაწეობას და თავის ქვეყანას არაერთი ღირსეული თაობა აღუზარდეს", - განაცხადა ზურაბ პატარაძემ.

ქალბატონებს დღესასწაული ასევე აჭარის ჯანდაცვის მინისტრმა ზაალ მიქელაძემ, საქართველოს პარლამენტარმა ანზორ ბოლქვაძემ და მუნიციპალიტეტის ხელმძღვანელმა პირებმა მიულოცეს.

დედის დღისადმი მიძღვნილი საზეიმო კონცერტი გაიმართა ქედისა და შუახევის მუნიციპალიტეტებში, რომელთაც აჭარის მთავრობის თავმჯდომარე, მთავრობის წევრები, მუნიციპალიტეტის ხელმძღვანელი პირები, საქართველოს პარლამენტის მაჟორიტარი დეპუტატი და საზოგადოების წარმომადგენლები ესწრებოდნენ. ღონისძიებაზე შეკრებილ ღვაწლმოსილ, მრავალშვილიან და სოციალურად დაუცველ ქალბატონებს ხელისუფლების წარმომადგენლებმა დღევანდელი დღე მიულოცეს და საჩუქრები გადასცეს.

(NS)