ზურაბ პატარაძე ბალკანეთის მძლეოსნობის ასოციაციის კონგრესს დაესწრო

2017-09-26 13:09:10, 1175 ნახვა

რეგიონი

აჭარის მთავრობის თავმჯდომარე ზურაბ პატარაძე ბალკანეთის მძლეოსნობის ასოციაციის კონგრესს დაესწრო.

ღონისძიებაზე საპატიო სტუმრად მოწვეული იყო მსოფლიო მძლეოსნობის ასოციაციის პრეზიდენტი, ბრიტანეთის პარლამენტისა და ლორდთა პალატის წევრი, ლორდი სებასტიან კოე, რომელიც ბათუმს საქართველოში ერთდღიანი ვიზიტის ფარგლებში ეწვია. კონგრესში მონაწილეობას ღებულობდნენ ევროპის მძლეოსნობის ასოციაციისა და ბალკანეთის მძლეოსნობის ასოციაციის 16 წევრი ქვეყნის პრეზიდენტები და გენერალური მდივნები.

აჭარის მთავრობის თავმჯდომარე კონგრესზე შეკრებილ სტუმრებს მიესალმა და მათ აჭარის ტურისტულ და საინვესტიციო პოტენციალზე ესაუბრა. ზურაბ პატარაძემ მადლობა გადაუხადა ორგანიზატორებს, რომლებმაც მძლეოსნობის მსოფლიო ლიდერების შეკრება საქართველოში, კერძოდ კი ულამაზეს ქალაქ ბათუმში მოაწყვეს.

,,ბათუმი საქმიანი ტურიზმის ნამდვილ ცენტრად იქცა, რაც ხელს უწყობს ოთხი სეზონის ტურიზმის განვითარებას ჩვენს რეგიონში. ვითარდება ტურიზმი, ვითარდება ინფრასტრუქტურა. ყოველწლიურად მზარდია საერთაშორისო ფრენების და ახალი სასტუმროების რაოდენობა. მოხარულები ვართ, რომ დღეს ეს შეხვედრა იმართება საქართველოში, კერძოდ სწორედ ბათუმში, სადაც ბოლო პერიოდში ძალიან მაღალი რანგის საერთაშორისო კონგრესები, ფორუმები, ბიზნეს-შეხვედრები თუ კულტურული ღონისძიებები იმართება", - აღნიშნა ზურაბ პატარაძემ.

კონგრესის ფარგლებში იმსჯელებენ მსოფლიოში მძლეოსნობის საერთაშორისო ღონისძიებების საორგანიზაციო საკითხებზე.

დღევანდელ კონგრესს ასევე ესწრებოდნენ ქალაქ ბათუმის მერი გიორგი ერმაკოვი, ბალკანეთის ქვეყნების მძლეოსნობის ასოციაციის პრეზიდენტი დობრომირ კარამარინოვი, საქართველოს ეროვნული ოლიმპიური კომიტეტის პრეზიდენტი ლერი ხაბელოვი, საქართველოს მძლეოსნობის ეროვნული ფედერაციის პრეზიდენტი ალექსი ახვლედიანი, საქართველოს მძლეოსნობის ეროვნული ფედერაციის გენერალური მდივანი ალექსანდრე ჯაფარიძე.

(NS)