ბაზალეთში ინსტრუქტორთა კურსის დახურვის ცერემონია გაიმართა

2017-09-15 18:17:16, 1261 ნახვა

სამხედრო

ბაზალეთში მდებარე საქართველოს შეიარაღებული ძალების ეროვნული გვარდიის სკოლაში ინსტრუქტორთა კურსის დახურვის ცერემონია გაიმართა.
თავდაცვის სამინისტროს ინფორმაციით, მსმენელებს კურსის წარმატებით დასრულება ეროვნული გვარდიის უფროსის მოადგილემ, ვიცე-პოლკოვნიკმა გიორგი მელითაურმა, დანიის შიდა გვარდიის სკოლის ჩრდილოეთ და შუალ იუტლანდის საწვრთნელი ცენტრის უფროსმა, მაიორმა იასპერ ოლესენმა და ეროვნული გვარდიის სკოლის უფროსმა, ვიცე-პოლკოვნიკმა ფრიდონ სიყმაშვილმა მიულოცეს, წარმატებები უსურვეს და სერტიფიკატები გადასცეს.
უწყების ცნობით, მაიორმა იასპერ ოლესენმა სიტყვით გამოსვლისას ყურადღება ქართულ მხარესთან მჭიდრო თანამშრომლობასა და ქართველი სამხედრო მოსამსახურეების პროფესიონალიზმზე გაამახვილა.

ტრენინგი საქართველოს შეიარაღებული ძალების ეროვნული გვარდიის, დანიის სამეფოს შიდა გვარდიისა და ესტონეთის თავდაცვის ლიგის სამმხრივი თანამშრომლობის ფარგლებში გაიმართა.
კურსის მიზანს ლექციის დაგეგმვის, ჩატარებისა და შეფასებისთვის საჭირო უნარ-ჩვევების გაუმჯობესება წარმოადგენდა. საქართველოს ეროვნული გვარდიის 15 სამხედრო მოსამსახურე ერთი კვირის განმავლობაში, თეორიული და პრაქტიკული მეცადინეობების მეშვეობით, ლექციის დამოუკიდებლად ორგანიზების მეთოდებს ეცნობოდა.
კურსის ინსტრუქტორებს შორის, რომლებიც დანიის სამეფოს შიდა გვარდიასა და ესტონეთის თავდაცვის ლიგას წარმოადგენენ, ესტონეთის ვორმსის მუნიციპალიტეტის გამგებელი, მოხალისე რეზერვისტი, უფროსი ლეიტენანტი ტანელ ვიკსი და დანიის ქალაქ შტრუერის ვიცე-მერი, შიდა გვარდიის რეზერვისტი, უფროსი ლეიტენანტი, მარტინ ჰულგარდი იმყოფებოდნენ.
საქართველოს ეროვნული გვარდია ესტონეთის თავდაცვის ლიგასა და დანიის სამეფოს შიდა გვარდიასთან ინტენსიურად თანამშრომლობს.
აღნიშნული თანამშრომლობის ფორმატში ეროვნული გვარდიის სკოლისა და მე-10 და მე-20 კადრირებული ბრიგადების ტერიტორიებზე რამდენიმე კურსიც ჩატარდა.
(NS)