ზურაბ პატარაძე ბათუმის სახელმწიფო საზღვაო აკადემიის სასწავლო წლის დაწყების საზეიმო ღონისძიებას დაესწრო

2017-09-15 13:34:43, 932 ნახვა

რეგიონი

აჭარის მთავრობის თავმჯდომარე ზურაბ პატარაძე საქართველოს ეკონომიკისა და მდგრადი განვითარების მინისტრის მოადგილე გიორგი ჩერქეზიშვილთან ერთად ბათუმის სახელმწიფო საზღვაო აკადემიის სასწავლო წლის დაწყების აღსანიშნავ საზეიმო ღონისძიებას დაესწრო.

ღონისძიებას მოწვეულ სტუმრებთან ერთად აჭარის უმაღლესი საბჭოს თავმჯდომარე დავით გაბაიძე, ქალაქ ბათუმის მერი გიორგი ერმაკოვი, აჭარის უმაღლესი საბჭოს განათლების, მეცნიერების, კულტურისა და სპორტის საკითხთა კომისიის თავმჯდომარე ვლადიმერ მგალობლიშვილი ესწრებოდნენ.

მთავრობის თავმჯდომარემ აკადემიის ეზოში შეკრებილ პირველკურსელებს სასწავლო წლის დაწყება მიულოცა.

,,მოხარული ვარ, რომ უკვე მეორედ მომეცა საშუალება მივულოცო აკადემიის პირველკურსელ სტუდენტებს სწავლის დაწყება. განსაკუთრებულად მნიშვნელოვანი და სამახსოვროა ეს დღე თქვენთვის, პირველკურსელებისთვის, რადგან დღეს თქვენ დგახართ ცხოვრების უმნიშვნელოვანესი ეტაპის დასაწყისთან - ეს არის პროფესიის არჩევის და სტუდენტობის ეტაპი, დრო, რომელიც ყველაზე მეტად გვამახსოვრდება და ყველაზე მეტად განსაზღვრავს ჩვენს მომავალს. მე განსაკუთრებით ამაყი ვარ დღეს, როცა ვხედავ მეზღვაურთა ფორმაში გამოწყობილ ამდენ ახალგაზრდას, რომლებმაც მთელს მსოფლიოში საპატიო და საამაყო პროფესია აირჩიეს. ბათუმი ხომ მეზღვაურთა ქალაქია. მე არაერთხელ მითქვამს, რომ მეზღვაური სტუდენტები განსაკუთრებულ ხიბლს სძენს ჩვენს ქალაქს და ამაში ყველანი დამეთანხმებით. თქვენ გახდით სტუდენტები ბათუმის საზღვაო აკადემიის, რომელიც დღეს თანამედროვე მოთხოვნების შესაბამის კვალიფიციურ კადრებს ამზადებს. ბოლო პერიოდში განხორციელებულმა მნიშვნელოვანმა რეფორმებმა გავლენა მოახდინა საზღვაო აკადემიის რეიტინგის ამაღლებაზე და წელს საზღვაო აკადემიას 575 პირველკურსელი ჰყავს, არცერთი ვაკანტური ადგილი არ დარჩა, რაც განაკუთრებით მახარებს" - აღნიშნა მილოცვის სიტყვაში აჭარის მთავრობის თავმჯდომარემ.

ბათუმის სახელმწიფო საზღვაო აკადემია ერთადერთი საზღვაო სასწავლებელია საქართველოში, რომელიც აღჭურვილია საერთაშორისო საზღვაო ორგანიზაციის მოთხოვნების შესაბამისი მატერიალურ-ტექნიკური ბაზითა და რომლის დიპლომიც საერთაშორისოდაა აღიარებული. საზღვაო აკადემიაში ორი მიმართულებით ხორციელდება საგანმანათლებლო პროცესი: საზღვაო-საინჟინრო ფაკულტეტი და ბიზნესისა და მართვის ფაკულტეტი. ამჟამად აკადემიაში დაახლოებით 2200 სტუდენტი სწავლობს.

(NS)