„გვეშინია, ამ უპატრონობის ჟამს რუსები სოფელში არ შემოვიდნენ“ - ბერშუეთის მცხოვრებლები დაცვას ითხოვენ

2017-07-06 11:42:30, 2897 ნახვა

რეგიონი

გორის მუნიციპალიტეტის სოფელ ბერშუეთის მცხოვრებლები ხელისუფლებას საოკუპაციო ძალების თავნებობისგან დაცვას სთხოვენ.

როგორც "ექსპრესნიუსს" ადგილობრივებმა განუცხადეს, ე.წ. საზღვარი, რომელიც ოკუპანეტბმა ორი დღის წინ 400-500 მეტრით გადმოწიეს, სოფლის ბაღებს ორად ჰყოფს.

"ხალხი გაუბედურებულია და მიტოვებული. არავინ არ ინტერესდება რა ხდება სოფლის თავს. პურის ყანები რუსებმა მიიტაცეს. ვერ ვიღებთ მოსავალს. გვეშინია, რომ ასეთი უპატრონობის ჟამს რუსები სოფელში არ შემოვიდნენ", - უთხრა "ექსპრესნიუსს" ბერშუეთის მცხოვრებმა.

ამასთან ავღანეთის სამშვიდობო ოპერაციაში დაღუპული ქართველის, ალექსანდრე კვიწინაძის ოჯახის წევრები ამბობენ, რომ რუსი ოკუპანტები სასაფლაოდან ერთ კილომეტრში იმყოფებიან.

ისინი ფიქრობენ, რომ სასაფლაო სადაც ქართველი სამხედროა დაკრძალული ოკუპანტების საზღვრებს მიღმა მოექცევა, ამიტომ ცხედარის გადმოსვენებაზე ფიქრობენ.

შეგახსენებთ, 4 ივლისს ოკუპანტებმა გორის რაიონის სოფელ ბერშუეთის მიმართულებით არსებულ საოკუპაციო ხაზზე, ე.წ. საზღვრის აღმნიშვნელი ახალი ბანერები დაამონტაჟეს, რის შედეგადაც, ადგილობრივების სასოფლო სამეურნეო სავარგული ნაწილობრივ ოკუპაციის ხაზს მიღმა მოექცა.

როგორც საქართველოს სახელმწიფო უსაფრთხოების სამსახურში განაცხადეს, აღნიშნული წარმოადგენს ე.წ. ბორდერიზაციის უკანონო პროცესის გაგრძელებას, რომელიც არა მარტო ზღუდავს ადგილობრივი მაცხოვრებლების ფუნდამენტურ უფლებებს, არამედ პირდაპირპროპორციულად აზიანებს უსაფრთხოების გარემოს ადგილზე.

„აღნიშნული საკითხი განსახილველად აუცილებლად დადგება 11 ივლისს ჩანიშნულ ინციდენტების პრევენციისა და მათზე რეაგირების ჯგუფის შეხვედრაზე სოფელ ერგნეთში“, განაცხადეს სუს-ში.

გარდა ამისა, ევროკავშირის სადამკვირვებლო მისიამ გაავრცელა ინფორმაცია, რომ სოფელ ბერშუეთთან ე.წ. ბორდერიზაციის ქმედებები ივნისის თვეშიც დაფიქსირდა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან