გენერალ-მაიორი ვახტანგ კაპანაძე ბაგრამის საავიაციო ბაზაზე იმყოფება

2015-01-10 11:10:53, 5958 ნახვა

სამხედრო

საქართველოს შეიარაღებული ძალების გენერალური შტაბის უფროსი ოფიციალური ვიზიტით ავღანეთის ისლამურ რესპუბლიკაში იმყოფება.

თავდაცვის სამინისტროს ინფორმაციით, ვიზიტის ფარგლებში, გენერალ-მაიორი ვახტანგ კაპანაძე ბაგრამის საავიაციო ბაზაზე ნატოს მოკავშირეთა გაერთიანებული ძალების უმაღლეს მთავარსარდალსა და აშშ-ის ევროპული სარდლობის მეთაურს, გენერალ ფილიპ ბრიდლავს შეხვდა.

უწყების ცნობით, გენერლებმა „მტკიცე მხარდაჭერის“ საერთაშორისო მისიაში საქართველოს შეიარაღებული ძალების მონაწილეობასა და სამომავლო გეგმებზე ისაუბრეს. შეხვედრის შემდეგ, გენერალმა ფილიპ ბრიდლავმა ბაგრამის საავიაციო ბაზაზე V ქვეითი ბრიგადის 51-ე ბატალიონის სამხედრო მოსამსახურეები მოინახულა.

ავღანეთში ვიზიტის ფარგლებში, ბაგრამის საავიაციო ბაზაზე გენერალური შტაბის უფროსმა ასევე, შეხვედრები გამართა "მტკიცე მხარდაჭერის" ოპერაციის სარდალთან, 4 ვარსკვლავიან გენერალთან ჯონ კემპბელთან, აშშ-ის არმიის გენერალ-მაიორთან ჯონ მიურეისთან და თურქეთის შეიარაღებული ძალების ბრიგადის გენერალთან საფაკ გოკთან.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან