ზურაბ პატარაძე ბაქოში ფიდე-ს გენერალური ასამბლეის გახსნას დაესწრო (ვიდეო)

2016-09-12 16:06:16, 950 ნახვა

რეგიონი

აჭარის ა.რ მთავრობის თავმჯდომარე ზურაბ პატარაძე ბაქოში ფიდე-ს გენერალური ასამბლეის გახსნას დაესწრო.

აჭარის მთავრობის ადმინისტრაციის პრესსამსახურის ინფორმაციით, ასამბლეა ფიდე-ს 87-ე კონგრესის ფარგლებში გაიმართა და იგი აზერბაიჯანის ახალგაზრდულ საქმეთა და სპორტის მინისტრმა, აზად მაჰიმოვმა გახსნა. იგი მიესალმა ბაქოში 42-ე ჭადრაკის ჩემპიონატისთვის ჩამოსულ სტუმრებს.

კონგრესზე სიტყვით გამოვიდა აჭარის ა.რ მთავრობის თავმჯდომარე ზურაბ პატარაძე. მთავრობის თავმჯდომარემ ისაუბრა ღონისძიების ბათუმში ჩატარების მნიშვნელობის შესახებ და მთავრობის მხრიდან მაქსიმალური მხარდაჭერა და ჩართულობა აღუთქვა ფიდეს წარმომადგენლებს.

ზურაბ პატარაძე დღესვე, ბაქოში მიმდინარე 42-ე მსოფლიო ჭადრაკის ოლიმპიადას დაესწრო და მონაწილეებთან სიმბოლურად რამდენიმე საჭადრაკო სვლაც შეასრულა. საერთაშორისო ღონისძიების ფარგლებში ზურაბ პატარაძე ოლიმპიადაზე წარმოდგენილ ბათუმის სტენდს ეწვია, სადაც ჭადრაკის ამ უდიდესი მოვლენის ბათუმში ჩატარების შესახებ ინფორმაცია-ანონსი უკვე განთავსებულია.

2018 წელს ჭადრაკის 44-ე მსოფლიო ოლიმპიადა ბათუმში ჩატარდება. ოლიმპიადა ფიდეს მიერ ორგანიზებული მთავარი გუნდური შეჯიბრია და ჭადრაკის მიმართულებით მსოფლიოში ერთ-ერთ უმნიშვნელოვანეს ღონისძიებას წარმოადგენს.

ბათუმი საჭადრაკო ოლიმპიადას პირველად უმასპინძლებს, თუმცა ქალაქს უმაღლესი დონის შეჯიბრებების მიღების ბრწყინვალე გამოცდილება აქვს: განვლილ წლებში ბათუმში გაიმართა ევროპის პირველი ჩემპიონატი ქალთა შორის, პირველი ინტერკონტინენტალური მატჩი ევროპასა და აზიას შორის, კონტინენტის პირველობა ინდივიდუალურ ჭადრაკში, ქალთა მსოფლიო ჩემპიონატი და სხვა.

(NS)