თურქეთში შეიარაღებული დაპირისპირება მიმდინარეობს

2016-09-12 10:57:50, 1904 ნახვა

მსოფლიო

თურქეთის სამხრეთ-აღმოსავლეთ ნაწილში შეიარაღებული დაპირისპირება მიმდინარეობს, - ამის შესახებ თურქული მედია იუწყება.

როგორც მედია საშუალება წერს, არეულობა მას შემდეგ მოხდა, რაც თურქეთის ხელისუფლებამ ქურთებით დასახლებული 28 ქალაქის მერი თანამდებობიდან მოხსნა.

აღნიშნული გადაწყვეტილება ანკარამ საგანგებო მდგომარეობის ფარგლებში მიიღო, რომლის ივლისის შუარიცხვებში მომხდარი გადატრიალების მცდელობის შემდეგ დაწესდა.

თანამდებობიდან მოხსნილი მერების ნაცვლად ანკარამ მთავრობის ნდობით აღჭურვილი პირები დანიშნა.

BBC ცნობით, აღნიშნული გადაწყვეტილების გასაპროტესტებლად თურქეთის ქალაქ სურუჩში საპროტესტო აქცია გაიმართა, რომელიც სამართალდამცველებმა ცრემლსადენი გაზის გამოყენებით დაარბიეს.

თურქეთის ხელისუფლება მიიჩნევს, რომ თანამდებობიდან მოხსნილ მერებს აშშ-ში მცხოვრები მქადაგებლის, ფეთჰულა გიულენის მოძრაობასთან ჰქონდათ კავშირი.

ოფიციალური ანკარა აცხადებს, რომ სამხედრო გადატრიალების მცდელობა სწორედ გიულენის ორგანიზებული იყო, რასაც ეს უკანასკნელი კატეგორიულად უარყოფს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან