გადაუდებელი აუცილებლობისას საგამოძიებო მოქმედება შესაძლოა, ჩხრეკის ორდერის გარეშე ჩატარდეს

2015-01-09 17:32:44, 5634 ნახვა

სამართალი

გადაუდებელი აუცილებლობის შემთხვევაში, საგამოძიებო მოქმედების ჩასატარებლად შესაძლოა, ჩხრეკის ორდერის გაცემა საჭირო აღარ იყოს.
ცვლილება „სისხლის სამართლის საპროცესო კოდექსში“ შედის, რომელიც პარლამენტშია ინიცირებული.
მოქმედი კანონით, გამომძიებელს საგნის, დოკუმენტის, ნივთიერების თუ ინფორმაციის შემცველი სხვა ობიექტის აღმოსაჩენად და ამოსაღებად საცავში, სადგომში, სათავსში ან სხვა მფლობელობაში შესვლის უფლება მხოლოდ სასამართლოს განჩინების, გადაუდებელი აუცილებლობის შემთხვევაში კი დადგენილების საფუძველზე აქვს.
კანონპროექტის თანახმად კი, გამომძიებელს აღნიშნული ქმედების გახორციელების უფლება სასამართლოს განჩინებისა და დადგენილების გარეშე ექნება.
პროექტის თანახმად, ამოღების ან ჩხრეკის დაწყების წინ გამომძიებელი ვალდებული იქნება პირს, რომელთანაც საგამოძიებო მოქმედება ტარდება სასამართლოს განჩინება გააცნოს, ხოლო გადაუდებელი აუცილებლობის შემთხვევაში ამოღების ან ჩხრეკის ჩატარების საფუძველი განუმარტოს. განჩინების გაცნობას, ამოღების ან ჩხრეკის გადაუდებლად ჩატარების საფუძვლის განმარტებას, პირი ხელმოწერით დაადასტურებს.
განჩინების გაცნობის, ხოლო გადაუდებელი აუცილებლობის შემთხვევაში ამოღების ან ჩხრეკის გადაუდებლად ჩატარების საფუძვლის განმარტების შემდეგ, გამომძიებელი პირს, რომელთანაც ტარდება ამოღება ან ჩხრეკა,შესთავაზებს ამოსაღები საგნის, დოკუმენტის, ნივთიერების თუ ინფორმაციის შემცველი სხვა ობიექტის ნებაყოფლობით გადაცემას. ამოსაღები ობიექტის ნებაყოფლობით გადაცემის შემთხვევაში აღნიშნული ფაქტი დაფიქსირდება ოქმში, ხოლო მის ნებაყოფლობით გადაცემაზე უარის თქმის ან მისი არასრულად გადაცემის შემთხვევაში ამოღება იძულებით მოხდება.
აღნიშნული კანონპროექტის ინიციატორები არიან, საპარლამენტო უმრავლესობის წარმომადგენლები მანანა კობახიძე, დავით საგანელიძე, გედევან ფოფხაძე, ზვიად კვაჭანტირაძე.