ცენტრალური აფრიკის რესპუბლიკაში ევროკავშირის ეგიდით მიმდინარე სამხედრო-მრჩეველთა მისია ოფიციალურად დასრულდა.

თავდაცვის სამინისტროს ინფორმაციით, საერთაშორისო მისიაში მონაწილე საქართველოს შეიარაღებული ძალების სწრაფი რეაგირების ჯგუფი სამშობლოში უკვე დაბრუნდა. თბილისის საერთაშორისო აეროპორტში ქართულ ხუთეულს გენერალური შტაბის უფროსის პირველი მოადგილე, პოლკოვნიკი ომარ ბეგოიძე დახვდა. მან აფრიკის კონტინენტიდან დაბრუნებულ სამშვიდობოებს მისიის წარმატებით განხორციელებისთვის მადლობა გადაუხადა.

„ცენტრალური აფრიკის რესპუბლიკაში დასრულდა ევროკავშირის მისია, რომელშიც საქართველოს შეიარაღებული ძალების ხუთკაციანი ჯგუფი მონაწილეობდა. ეს ჯგუფი სწრაფი რეაგირების ამოცანას ასრულებდა. ჩვენი ბიჭები ევროკავშირის მრჩევლების უსაფრთხოებას იცავდნენ და მაღალ დონეზე შეასრულეს დაკისრებული ამოცანები. დღეს მშვიდობით დაბრუნდნენ საქართველოში. მათ ევროკავშირის სამხედრო და პოლიტიკური ხელმძღვანელობისგან მაღალი შეფასება დაიმსახურეს. ჩვენ უკვე ვემზადებით ევროკავშირის ახალი მრჩეველთა მისიისთვის, რომელიც ცენტრალური აფრიკის რესპუბლიკაში უახლოეს მომავალში დაიწყება“, - აღნიშნა პოლკოვნიკმა ომარ ბეგოიძემ.

ქართულმა სწრაფი რეაგირების ხუთეულმა სამხედრო-მრჩეველთა მისია მიმდინარე წლის 12 აპრილიდან 11 ქვეყნის სამხედრო მოსამსახურეებთან ერთად შეასრულა. ეს უკვე მეორე ქართული ქვედანაყოფია, რომელიც ცენტრალური აფრიკის რესპუბლიკის დედაქალაქ ბანგიში სამხედრო-მრჩეველთა მისიაში (EUMAM RCA) იყო ჩართული.

სამხედრო-მრჩეველთა მისია 2015 წლის 16 მარტს დაიწყო და მიმდინარე წლის 16 ივლისს ოფიციალურად დასრულდა. სამშვიდობო ოპერაციაში მონაწილე სამხედროებს მისიის წარმატებით დასრულება ფრანგმა ბრიგადის გენერალმა დომინიკ ლოჟელმა მიულოცა და საგარეო საქმეებისა და უსაფრთხოების პოლიტიკაში ევროკავშირის მაღალი დონის წარმომადგენლობის სახელით ევროკავშირის მედალი „EUMAM RCA“ გადასცა.

ევროკავშირის ეგიდით ცარ-ში წარმოებული სამშვიდობო ოპერაცია ადგილობრივი მთავრობის დახმარებას და მათთვის უსაფრთხოების სექტორის რეფორმასა და ადგილობრივი სამხედრო ძალების რეორგანიზაციაში მხარდაჭერას ისახავდა მიზნად. ქართული სწრაფი რეაგირების ხუთეულის მთავარი ამოცანა მაღალი რანგის პირების ესკორტირება და დაცვის უზრუნველყოფა იყო.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ზელენსკი თანახმაა არ დაარტყას რუსეთის ენერგეტიკას, თუ რუსეთი შეწყვეტს უკრაინის ენერგეტიკულ ობიექტებზე, საწყობებსა და პორტებზე თავდასხმას

შოტლანდიის, უელსისა და ჩრდილოეთ ირლანდიის ლიდერებმა ხელი მოაწერეს დეკლარაციას გაერთიანებული სამეფოს შემადგენლობიდან გასვლის უფლების შესახებ

ტრამპმა განაცხადა, რომ უკრაინა დათანხმდა რუსეთის ნავთობგადამამუშავებელ ქარხნებზე თავდასხმების შეჩერებას

პუტინის მეგობარი კრემლოვი ტრამპის შვილის ერიკის ქორწილში იმყოფებოდა და ხარჯებიც დაფარა