მიხეილ სააკაშვილი: როდესაც საქმე გაქვს მაფიოზ სახელმწიფოსთან, აღარ გაკვირვებს რაც მოხდა

2015-03-03 13:11:24, 481 ნახვა

პოლიტიკა

„როდესაც საქმე გაქვს მაფიოზ სახელმწიფოსთან, სადაც მხოლოდ დაშინებისა და სიძულვილის ატმოსფეროა, უკვე აღარ გაკვირვებს რაც მოხდა“, - ამის შესახებ საქართველოს ექს პრეზიდენტმა და უკრაინის პრეზიდენტის პეტრო პოროშენკოს მრჩეველმა მიხეილ სააკაშვილმა „სი-ენ-ენ“,-თვის მიცემულ ინტერვიუში რუსი ოპოზიციონერის ბორის ნემცოვის მკვლელობასთან დაკავშირებით განაცხადა.
სააკაშვილის თქმით, რუსეთის პრეზიდენტი პუტინი ყველაფერს აკეთებს იმისთვის, რომ რუსმა ხალხმა სიმართლე არ გაიგოს.
„ტრაგედიაა რაც მოხდა, მაგრამ სიმართლეა რომ, ის ერთ-ერთია იმ ბევრ ადამიანს შორის ვინც ანალოგიურ გარემოებაში დაიღუპა. ეს სია ყოველდღიურად იზრდება. როდესაც საქმე გაქვს მაფიოზ სახელმწიფოსთან, სადაც მხოლოდ დაშინებისა და სიძულვილის ატმოსფეროა უკვე აღარ გაკვირვებს რაც მოხდა. ამ ყველაფრის ფონზე მგონია, რომ უკრაინასთან დაკავშირებით უფრო მნიშვნელოვანი გადაწყვეტილებები უნდა იქნას მიღებული. რუსეთში სიმართლეს მალავენ, დანარჩენმა მსოფლიომ კი სიმართლე იცის, თუმცა საკმარის ქმედებებს არ მიმართავენ. პუტინი ახლა ყველა მიმართულებით მუშაობს, რომ უფლება არ მისცეს რუს ხალხს სრული სიმართლე გაიგოს“,-განაცხადა სააკაშვილმა.
ამასთან, მიხეილ სააკაშვილმა აღნიშნა, რომ ბორის ნემცოვთან ბოლო შეხვედრის დროს, ის და ნემცოვი უკრაინის კრიზისზე საუბრობდნენ.
მისივე თქმით, ნემცოვი უკრაინის კრიზისთან დაკავშირებით ანგარიშს ამზადებდა.
„რეალობა ის არის, რომ დღევანდელ რუსეთში ყველგან დაშინების ატმოსფეროა. ოპოზიციის ლიდერების უმეტესობა ან გადასახლებულია, ან ციხეშია ნავალნივით და ან მკვდარია ნემცოვივით. რა ქვეყანაა ეს? ის ნამდვილად საშიში ადგილი ხდება საკუთარი მოქალაქეებისთვისაც და დანარჩენი მსოფლიოსთვისაც“,-აღნიშნა მიხეილ სააკაშვილმა.
ცნობისთვის, საქართველოს ექს პრეზიდენტი მიხეილ სააკაშვილი „სი-ენ-ენ“,-ის ეთერში პეტრო პოროშენკოს მრჩევლის სტატუსით იყო მოწვეული.