ევროპაში აშშ-ის სარდლობის წარმომადგენლები საქართველოს თავდაცვის სამინისტროს ეწვივნენ.

უწყების ინფორმაციით, ამერიკელ სტუმრებს საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ და თავდაცვის მინისტრის მოადგილემ ბესიკ ლოლაძემ უმასპინძლეს.

ვიზიტი ქართულ-ამერიკული ერთობლივი სწავლების „Jackal Stone“-ის მომზადების პროცესის ფარგლებში განხორციელდა. ვიზიტის მიზანი აღნიშნულ სწავლებაში ჩართული უწყებების ხელმძღვანელ პირებთან შეხვედრები და სამომავლო ღონისძიებების დაგეგმვაა.

შეხვედრის მონაწილეებმა ერთობლივი სამხედრო სწავლებების გამართვის მნიშვნელობაზე ისაუბრეს და აღნიშნეს, რომ მსგავს წვრთნებს საქართველოსთვის პრაქტიკულთან ერთად პოლიტიკური შედეგები მოაქვს. მხარეებმა განსაკუთრებული ყურადღება გაამახვილეს ახლახან ჩატარებულ ქართულ-ამერიკულ სწავლება „ღირსეული პარტნიორი 2016“-ზე.

„ძალიან მნიშვნელოვანი დელეგაციაა ჩამოსული საქართველოში. მათი ამოცანაა, საბოლოოდ შეამოწმონ თუ რამდენად სწორად და დროულად მიმდინარეობს საერთაშორისო უწყებათაშორისი სწავლების მომზადება. სწავლებაში ჩართულია როგორც ამერიკული, ასევე ქართული მხარის სხვადასხვა უწყებები. ეს სწავლება კარგი ტესტი იქნება იმის გასარკვევად,  რამდენად ეფექტიანია ჩვენი კრიზისების მართვის სისტემა და რა იქნება გასაუმჯობესებელი ამ სისტემის გამართული მუშაობისთვის“, - განაცხადა გენერალ-მაიორმა ვახტანგ კაპანაძემ.

სწავლება „Jackal Stone“-ის ჩატარება აგვისტოში იგეგმება, მასში მონაწილეობას მიიღებს აშშ-ის ევროპული სარდლობისა და სპეციალური ოპერაციების ძალების სარდლობის 500-მდე სამხედრო მოსამსახურე. ქართული მხრიდან წვრთნებში ჩართული იქნება შინაგან საქმეთა სამინისტროს და სახელმწიფო უსაფრთხოების სამსახურის 130 წარმომადგენელი. თავდაცვის სამინისტროს და შეიარაღებული ძალების ჩართულობა სწავლებაში  ლოგისტიკური მხარდაჭერის აღმოჩენას გულისხმობს.

სწავლების სცენარი ანტიტერორისტული და საპოლიციო ოპერაციების ჩატარებას მოიცავს. წვრთნებში აქტიურად  გამოიყენებენ სატრანსპორტო და სადაზვერვო ავიაციის ელემენტებს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

აშშ ევროპას აფრთხილებს იარაღის მიწოდების შეფერხების შესახებ, რაც გამოწვეულია მარაგების ამოწურვით

აშშ გერმანიიდან 5000 ჯარისკაცს გაიყვანს

საპატრიარქო - ვხედავთ შემთხვევებს, როცა ეკლესიის არაკეთილმოსურნენი ყველა ღონეს ხმარობენ, რათა საზოგადოებაში დააკნინონ სინოდის სხდომის მიმართ სამართლიანობის განცდა

აშშ-ის კონგრესში წარადგინეს რეზოლუცია ჟურნალისტების უფლებების დაცვის შესახებ, სადაც მზია ამაღლობელიც არის ნახსენები