ხულოს მუნიციპალიტეტში ყველის საწარმო გაიხსნა

2016-05-31 19:46:04, 1450 ნახვა

რეგიონი

ხულოს მუნიციპალიტეტის სოფელ დიოკნისში ყველის საწარმო შპს „ნატურალ პროდუქცია“- გაიხსნა. საწარმოს ოფიციალურ გახსნას აჭარის სოფლის მეურნეობის მინისტრი ზაურ ფუტკარაძე და ხულოს მუნიციპალიტეტის გამგებელი ბესიკ ბაუჩაძე დაესწრნენ. ინვესტიცია შვეიცარიის განვითარებისა და თანამშრომლობის სააგენტოს ფინანსური მხარდაჭერით განხორციელდა. შპს „ნატურალ პროდუქცია“ არის ყველის პირველი საწარმო აჭარის რეგიონში, რომელსაც განსაკუთრებული წვლილი შეაქვს რეგიონის მეცხოველეობის დარგის განვითარებაში. საწარმო აღჭურვილია უახლესი ტექნოლოგიებით და ყველის წარმოება სურსათის უვნებლობის სტანდარტების მიხედვით ხდება. საწარმო ხულოს მუნიციპალიტეტის 15-ზე მეტი სოფლიდან იბარებს რძეს და დღიურად 800-ზე მეტ ადგილობრივ ფერმერს ემსახურება, რომელთაც შემოსავლის მნიშვნელოვანი წყარო გაუჩნდათ.

საწარმო დღიურად 4-დან 6 ტონამდე რძეს ამუშავებს და იმერულ ყველს, სულგუნს, ნადუღსა და კარაქს აწარმოებს. წარმოებული პროდუქციის რეალიზაცია ხდება ბათუმის აგრარულ ბაზარზე, წამყვან სასტუმრო-რესტორნებსა და სუპერმარკეტებში. საწარმოში 30-მდე ადგილობრივი მკვიდრია დასაქმებული. ყველის საწარმოს გახსნას ასევე ესწერებოდნენ დონორი ორგანიზაციის შვეიცარიის განვითარებისა და თანამშრომლობის სააგენტოს წარმომადგენელები. ,,მეცხოველეობა ერთ-ერთი მნიშვნელოვანი მიმართულებაა სოფლის მეურნეობაში. რძის გადამამუშავებელი საწარმოების შექმნა საგრძნობლად გააძლიერებს მერძევეობის სექტორს და ხელს შეუწყობს რეგიონის მოსახლეობის ეკონომიკური მდგომარეობის გაუმჯობესებას.

აჭარის სოფლის მეურნეობის სამინისტრო დიდ ყურადღებას უთმობს სოფლის მეურნეობის მდგრად განვითარებას, რაც გამოიხატება იმაში რომ მეცხოველეობის დარგის განვითრების კუთხით არა ერთი პროგრამა განხორციელდა. დღევანდელი ღონისძიებაც საერთაშორისო ორგანიზაციებთან თანამშრომლობის გაღრმავებისკენ გადადგმული კიდევ ერთი ნაბიჯია, რომელიც აჭარის მაღალმთიანეთში მერძევეობის განვითარების ხელშეწყობისკენ არის მიმართული. აღნიშნული პროგრამა დარგის განვითარებას შეუწყობს ხელს და საშუალებას იძლევა შეიქმნას ახალ სამუშაო ადგილები, რაც დამატებით შემოსავალს მოუტანს სოფლად მაცხოვრებლებს’’. - განაცხადა აჭარის სოფლის მეურნეობის მინისტრმა ზაურ ფუტკარაძემ.