ვაზიანის სამხედრო აეროდრომზე ქართველი, ამერიკელი და ბრიტანელი სამხედროები სწავლება „ღირსეული პარტნიორის“ დასაწყებად ემზადებიან.

როგორც „ექსპრესნიუსს“ თავდაცვის სამინისტროდან აცნობეს, მომზადების პროცესში ჩართულია ქართულ-ამერიკულ წვრთნებში მონაწილე ამერიკული M1A 2 ტიპის ტანკები  „ABRAMS“ და ქვეითთა საბრძოლო მანქანები  „M2 BRADLEY“, ასევე , ქართულ შეიარაღებაში არსებული T-72 ტიპის ტანკები და ქვეითთა საბრძოლო მანქანები БМП-2. 

მათივე ინფორმაციით, ქართულ-ამერიკული სწავლების „ღირსეული პარტნიორის“ დაწყებისთვის მზადების პროცესს საქართველოს შეიარაღებული ძალების გენერალური შტაბის უფროსი, გენერალ-მაიორი ვახტანგ კაპანაძე დაესწრო.

როგორც გენერალ-მაიორმა ვახტანგ კაპანაძემ  აღნიშნა, სწავლების დაწყებისთვის მოწმდება ადგილმდებარეობა და სწავლების დაწყებისთვის მიმდინარეობს მზადება.

„მიმდინარეობს სწავლების დაწყებისთვის მზადება. მოწმდება ადგილმდებარეობა, ტექნიკის გამოყვანა, მონახაზების შემუშავება, თუ რა და როგორ უნდა გაკეთდეს. მიმდინარეობს ადგილმდებარეობის დამატებითი რეკოგნოსცირება. სწავლებაში მონაწილე ყველა მხარის დაინტერესება მაღალია, ენთუზიაზმი ძალიან მაღალია და იმედია, წარმატებით ჩაივლის ეს სწავლება“,- განაცხადა კაპანაძემ.

დღესვე სწავლებისთვის მოსამზადებელი ღონისძიებების ფარგლებში ამერიკელმა სამხედროებმა C-130 ტიპის სამხედრო თვითმფრინავიდან პარაშუტით დესანტის გადმოსხმის ოპერაციაც განახორციელეს. შემოწმდა სამხედროების აღჭურვილობა და მზადყოფნა.

ცნობისთვის, ქართულ-ამერიკული სწავლება, ოფიციალურად, 11 მაისს გაიხსნება და მასში 1300 სამხედრო მოსამსახურე მიიღებს მონაწილეობას. სწავლებაში აშშ-ის არმიის ევროპული სარდლობის 650, 500 ქართველი და 150 ბრიტანელი სამხედრო ჩაერთვება.

ერთობლივი ქართულ-ამერიკული სწავლება მნიშვნელოვნად დაეხმარება საქართველოს შეიარაღებულ ძალებს და კონკრეტულად იმ ასეულს, რომელიც შეუერთდა ნატოს სწრაფი რეაგირების ძალებს. ასევე, გაზრდის ქვეყნის ტერიტორიული თავდაცვისუნარიანობას. სამხედრო სწავლება აძლიერებს საქართველოს და შეერთებული შტატების, საქართველოს და ბრიტანეთის, ასევე, ნატოს წევრი ქვეყნების თუ რეგიონული პარტნიორების ურთიერთთავსებადობას. ამ სწავლებით იზრდება საქართველოს თავდაცვისუნარიანობა, ძლიერდება რეგიონის უსაფრთხოება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პენტაგონმა ბალტიისპირეთის ქვეყნებს მოუწოდა, თავი შეიკავონ რუსეთის წინააღმდეგ მკაცრი განცხადებებისგან

ბათუმში მაღაზია გაქურდეს – დააკავეს ორი არასრულწლოვანი

ნორვეგიის ჰელსინკის კომიტეტი - ჩვენ ვგმობთ „ქართული ოცნების“ მცდელობას, საკონსტიტუციო სასამართლოს მეშვეობით აკრძალოს ხუთი ოპოზიციური პარტია

ჰაკერებმა მსხვილი კრიპტოვალუტის ბირჟა გატეხეს და შესაძლოა, მილიარდობით დოლარი მოიპარეს