აჭარის მთავრობამ ებრაელ ტურისტებს ფესახის დღესასწაული საზეიმო კონცერტით მიულოცა

2016-04-28 10:59:35, 1522 ნახვა

რეგიონი

აჭარის მთავრობის ორგანიზებით ხელოვნებისა და მუსიკის ცენტრში ბათუმში მყოფი ებრაელი ტურისტებისთვის ფოლკლორული კონცერტი ჩატარდა.

აჭარის მთავრობის ადმინისტრაციის პრესსამსახურის ინფორმაციით, 600-მდე ებრაელი ტურისტი აჭარაში ფესახის დღესასწაულთან დაკავშირებით იმყოფება.

ფესახი უდიდესი ებრაული დღესასწაულია, რომელიც ებრაელი ხალხის ეგვიპტელთა მონობიდან გამოხსნას ეძღვნება. ებრაული ფესახი ყოველწლიურად აღინიშნება გაზაფხულის ნისანის თვის მეთოთხმეტე დღეს. ზეიმი გრძელდება შვიდი დღის მანძილზე ისრაელში და რვა დღის განმავლობაში ქვეყნის გარეთ. პილიგრიმული დღესასწაულის დღეები ერთდროულად მსოფლიოს სხვადასხვა კუთხეში აღინიშნება, ბათუმში ფესახის დღეები წელს პირველად ტარდება.

ფესახის პროექტი საქართველოში 20 აპრილიდან 1 მაისამდე ხორციელდება ტურ-კომპანია ASIA TRAVEL -ისა (ისრაელი) და ტურ-ოპერატორ NES TRAVEL-ის (საქართველო) ორგანიზებით. ქალაქ ბათუმში ფესახის პროექტის ფარგლებში 6 ქვეყნიდან მონაწილე ებრაელი ტურისტებია მოწვეული. საქართველოში ყოფნის დროს, სტუმრები გაეცნობიან მაღალმთიანი აჭარისა და ბათუმის ტურისტულ ღირშესანიშნაობებს, რაც ხელს შეუწყობს აჭარის, როგორც ტურისტული რეგიონის პოპულარიზაციას. ქართული კულტურისა და რეგიონის ფოლკლორული სიმდიდრის გაცნობის მიზნით, აჭარის ა/რ მთავრობა ებრაელ სტუმრებს სპეციალური კონცერტით გაუმასპინძლდა, რომელშიც მონაწილეობა მიიღო აჭარის მელიტონ კუხიანიძის სახელობის სიმღერისა და ცეკვის სახელმწიფო აკადემიურმა ანსამბლმა.

აღსანიშნავია, რომ მარტის თვეში, ბათუმის საერთაშორისო აეროპორტში გასული წლის ანალოგიურ პერიოდთან შედარებით უცხოელ ვიზიტორთა 48 % -იანი ზრდა დაფიქსირდა. განსაკუთრებული ზრდა კი ისრაელიდან შეინიშნება. გასულ თვეში ბათუმის საერთაშორისო აეროპორტიდან აჭარაში 2015 წლის მარტთან შედარებით 22-ჯერ მეტი ებრალი ვიზიტორი ჩამოვიდა.