პაპუაშვილმა ე.წ გამჭვირვალობის კანონი და ნამოჰვანჰესის ჩაგდებული პროექტი ერთმანეთს დაუკავშირა

2026-09-18 12:38:47, 3403 ნახვა

პოლიტიკა

გამჭვირვალობის კანონი არის ყველაზე ქართული კანონი, რაც ბოლო წლებში საქართველოს პარლამენტმა მიიღო. - ამის შესახებ ივანიშვილის პარლამენტის თავჯდომარებ შალვა პაპუაშვილმა განაცხადა.

მან რატომღაც ე.წ გამჭვირვალობის კანონი და ნამოჰვანჰესის ჩაგდებული პროექტი ერთმანეთს დაუკავშირა.

„ამ დღეებში შეგვახსენეს ნამახვანჰესის თემა, სადაც ჯერ კიდევ მიმდინარეობს სასამართლო პროცესები. თუმცა არსებობს რისკი, რომ საქართველოს ბიუჯეტს კომპანიის სასარგებლოდ 400 მილიონი დოლარის გადახდა დაეკისროს. ეს არის კომპანია, რომელიც, ფაქტობრივად, უცხოეთიდან დაფინანსებულმა აგენტურამ აქედან გააგდო. გარდა იმისა, რომ საქართველომ ზიანი მიიღო იმის გამო, რომ ეს მნიშვნელოვანი ენერგეტიკული პროექტი არ განხორციელდა, დამატებით შეიძლება, საქართველოს ბიუჯეტიდან მოგვიწიოს იმ ზიანის ანაზღაურება, რომელიც უცხოური დაფინანსებით მოქმედმა ორგანიზაციებმა მიაყენეს. შეგახსენებთ, მაშინ ამ კამპანიას სრულად კურირებდა სამი არასამთავრობო ორგანიზაცია – „მწვანე ალტერნატივა“, „სოციალური სამართლიანობის ცენტრი“ და „საია“. სამივე დაფინანსებული იყო ბრიუსელიდან და რამდენიმე სხვა წყაროდან. დღეს უკვე ყველამ იცის, რა ფარსი მოაწყეს – სრული დეზინფორმაცია, მართლაც ჰიბრიდული თავდასხმა საქართველოზე, რათა ერთ-ერთი მნიშვნელოვანი ენერგეტიკული პროექტი ჩაშლილიყო და ჩაშალეს კიდეც ბრიუსელიდან დაფინანსებულმა ორგანიზაციებმა.

ნამახვანჰესის ისტორია არის ყველაზე კარგი დასტური იმისა, რომ გამჭვირვალობის კანონი არის ყველაზე ქართული კანონი, რაც კი შეიძლება, მიიღო პარლამენტმა ბოლო წლების განმავლობაში. კანონი ემსახურება ქართულ ინტერესებს და იმ მავნებლობას, რაც ჩაიდინეს ბრიუსელიდან დაფინანსებულმა ადამიანებმა, როდესაც ჩაშალეს ყველაზე მნიშვნელოვანი ენერგეტიკული პროექტი, ასეთი მავნებლობა ვეღარ მოხდება“, – განაცხადა შალვა პაპუაშვილმა.

Patreon P მხარი დაუჭირე "ექსპრესნიუსს" →

ავტორი: ელენე გვიმრაძე, ექსპრესნიუსის რეპორტიორი 2018 წლიდან