საოკუპაციო ხაზთან ახლოს დაკავებული 31 წლის საქართველოს მოქალაქე გაათავისუფლეს

2026-09-01 16:40:11, 962 ნახვა

სამართალი

საქართველოს მოქალაქე გიორგი უზნაძე, რომელიც 2026 წლის მარტში ცხინვალის რეგიონში, საოკუპაციო ხაზთან, სოფელ ორჭოსანთან გაიტაცეს, გაათავისუფლეს. სახელმწიფო უსაფრთხოების სამსახურის ცნობით, ის ამჟამად თბილისის მიერ კონტროლირებად ტერიტორიაზე იმყოფება.

ე.წ. სამხრეთ ოსეთის კაგებე მისი დაკავების თარიღად 17 მარტს, ხოლო საქართველოს სახელმწიფო უსაფრთხოების სამსახური 18 მარტს ასახელებს.

ცხინვალმა განაცხადა, რომ 1 სექტემბერს, „ექვსთვიანი პატიმრობის შემდეგ, ის [უზნაძე] გაათავისუფლეს და ქართულ მხარეს გადასცეს“. დე ფაქტო ხელისუფლებამ მას „საზღვრის უკანონო გადაკვეთაში“ დაადანაშაულა. მათ ასევე განაცხადეს, რომ 31 წლის მამაკაცი კასპის მუნიციპალიტეტის სოფელ სამთავისის მკვიდრია.

Patreon P მხარი დაუჭირე "ექსპრესნიუსს" →

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან