იურისტი - იდეოლოგიური ნიშნით ადამიანების დევნის მიზნის მქონე ორგანიზაციის შექმნა ხელისუფლებასთან დაახლოებული პირთა ჯგუფის მიერ არის არამხოლოდ მძიმე სამართლებრივი, არამედ, პოლიტიკური განაცხადიც

2026-07-27 15:51:53, 1931 ნახვა

სამართალი

ადვოკატი ომარ ფურცელაძე MMA-ის მებრძოლის, გიორგი ქართველიშვილის მიერ „ქართული ღირებულებების, ფასეულობების და ტრადიციების დაცვის მიზნით“ ახალი მოძრაობის დაფუძნებას ეხმაურება.

ადვოკატი წერს, რომ იდეოლოგიური ნიშნით ადამიანების დევნის მიზნის მქონე ორგანიზაციის შექმნა ხელისუფლებასთან დაახლოებული პირის ან პირთა ჯგუფის მიერ არის არამხოლოდ მძიმე სამართლებრივი, არამედ, პოლიტიკური განაცხადიც.

“[ჩვენი ორგანიზაცია] გაუკუღმართებული იდეოლოგიის მქონე ადამიანებისა და მათგან შემდგარი ჯგუფების წინააღმდეგ იწყებს ბრძოლას.”

[….] “არანაირ საფრთხეს არ მოვერიდებით. მზად ვართ, […] ციხეშიც წავიდეთ".

- ცალკე აღებული, ზემოთ ნაჩვენები ტექსტი და შესაბამისად ქმედება (ორგანიზაციის შექმნა) არის სისხლის სამართლის მძიმე დანაშაული.

- მეორე მხრივ, იდეოლოგიური ნიშნით ადამიანების დევნის მიზნის მქონე ორგანიზაციის შექმნა ხელისუფლებასთან დაახლოებული პირის ან პირთა ჯგუფის მიერ არის არამხოლოდ მძიმე სამართლებრივი, არამედ, პოლიტიკური განაცხადიც.

იმედს ვიტოვებ, მინიმალური კეთილგონიერება მაინც აღმოაჩნდება ვინმეს იმისთვის, რომ ისედაც მძიმე პოლარიზებულ გარემოში მდგომარეობის სრული რადიკალიზაცია არ დაუშვას, - წერს ფურცელაძე.

MMA-ს მებრძოლმა "ქართულ ოცნებასთან" დაახლოებულმა გიორგი ქართველიშვილმა განაცხადა, რომ ის ქმნის ახალ საზოგადოებრივ მოძრაობას ქართული ტრადიციების, ღირებულებებისა და ეროვნული იდენტობის დასაცავად. საჭიროების შემთხვევაში, ის ციხეშიც კი მოხვდება.

საქართველოს ჟურნალისტთა ფედერაციის ოფისში მან განაცხადა, რომ მოძრაობა იქნება პროაქტიული და კონსტრუქციული. ქართველიშვილმა ხაზგასმით აღნიშნა, რომ მოძრაობის წევრები მზად არიან ნებისმიერი რისკის გასაწევად ქართული კულტურის დასაცავად.

Patreon P მხარი დაუჭირე "ექსპრესნიუსს" →

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან