აშშ-სა და ირანს შორის ვითარება დაიძაბა. „აქსიოსის“ ცნობით, ვაშინგტონი ჰორმუზის სრუტეში შექმნილი კრიზისის გამო ირანთან მრავალდღიანი და შესაძლოა მრავალკვირიანი სამხედრო დაპირისპირებისთვის ემზადება. შექმნილ ესკალაციას საფუძველი 7 ივლისს ჩაეყარა, როდესაც შეერთებულმა შტატებმა ირანის სამხედრო სამიზნეებზე თავდასხმა დაიწყო, მას შემდეგ, რაც თეირანი ჰორმუზის სრუტეში სავაჭრო გემებზე თავდასხმებში დაადანაშაულა.

სამხედრო მოქმედებების განახლებამდე ვაშინგტონმა ირანულ ნავთობზე სანქციებიც აღადგინა. 8 ივლისს აშშ-ის ცენტრალური სარდლობის ძალებმა ირანის ობიექტებზე დამატებითი დარტყმები განახორციელეს.

სარდლობის განცხადებით, ოპერაციის მიზანია ირანის იმ შესაძლებლობების განადგურება, რომლებიც საფრთხეს უქმნის ჰორმუზის სრუტეში თავისუფალ ნავიგაციას, და თეირანისთვის პასუხისმგებლობის დაკისრება სავაჭრო გემებსა და სამოქალაქო ეკიპაჟებზე განხორციელებული აგრესიის გამო. ირანული სახელმწიფო მედია და ღია წყაროები (OSINTdefender) აფეთქებებს ადასტურებენ ისეთ საპორტო ქალაქებში, როგორებიცაა ბანდარ აბასი, კონარაკი, ჩაბაარი, ასევე სისთანსა და ბალუჩისტანში. თავის მხრივ, ისლამური რევოლუციის გუშაგთა კორპუსმა (IRGC) განაცხადა, რომ აშშ-მა ირანის აღმოსავლეთ პროვინციებში დაბომბა ორი ხიდი, რომლებიც წმინდა ქალაქ მეშჰედისკენ მიდის, რისი მიზანიც წამებულ ლიდერთან გამომშვიდობების ცერემონიისთვის ჩრდილის მიყენება იყო. შექმნილი ვითარების საპასუხოდ, IRGC-ზე დაყრდნობით გავრცელდა ცნობები ქუვეითსა და ბაჰრეინში განთავსებულ აშშ-ის სამხედრო ბაზებზე ირანის მიერ განხორციელებული საპასუხო დარტყმების შესახებ.

პარალელურად, უმაღლეს დონეზე გამწვავდა ვერბალური დაპირისპირებაც: დონალდ ტრამპის პოზიცია: ანკარაში, ნატოს სამიტზე მყოფმა აშშ-ის პრეზიდენტმა განაცხადა, რომ თეირანთან ცეცხლის შეწყვეტის შეთანხმება „დასრულდა“ და ირანს „ღამით მძიმე დარტყმით“ დაემუქრა. ტრამპმა ირანის ხელმძღვანელობას „შეშლილები“ და „მატყუარები“ უწოდა, ხოლო ჟურნალისტებთან საუბრისას აღნიშნა, რომ ირანელებმა კონტროლი დაკარგეს, თუმცა შეთანხმების მიღწევა ძალიან სურთ. 

ირანის საგარეო საქმეთა მინისტრმა, აბას არაყჩიმ, პლატფორმა X-ზე ტრამპის განცხადებებს უპასუხა და აღნიშნა, რომ ირანელი ხალხისადმი დამამცირებელი მიმართვა ქვეყნის სიდიადეს ვერ დააკნინებს. მისი თქმით, ირანი ვულგარულობით კი არ პასუხობს, არამედ „დიდი სიმამაცითა და უშიშარი მოქმედებით“. დაპირისპირების გეოგრაფია და მხარეთა მკაცრი პოზიციები მიუთითებს, რომ ჰორმუზის სრუტის გარშემო დაწყებული სამხედრო კრიზისი შესაძლოა ხანგრძლივ და ფართომასშტაბიან კონფლიქტში გადაიზარდოს.

ავტორი: ექსპრესნიუსი,

სოციალური ქსელები

ტრამპმა ლიეტუვას მოსთხოვა, ევროკავშირის სანქციების გვერდის ავლის მიზნით, ბელარუსული კალიუმის ექსპორტისთვის პორტი გაეხსნა

სოციალური სამართლიანობის ცენტრი - საარსებო შემწეობის მიმღებთა რაოდენობის მკვეთრი კლება არაერთ კითხვას აჩენს

კობახიძე აზარტული თამაშების საერთაშორისო ტურნირთან დაკავშირებულ კანონზე - ეს არ არის განსაკუთრებული მნიშვნელობის მქონე კანონპროექტი

რუსეთის მიერ ოკუპირებული ოლეშკადან ხალხის ევაკუაცია დაიწყო