23 ივნისს, ევროპის საბჭოს საპარლამენტო ასამბლეა ზაფხულის პლენარულ სესიაზე განიხილავს საქართველოს შესახებ ანგარიშს. ანგარიში, სახელწოდებით „დემოკრატიული ინსტიტუტების ფუნქციონირება საქართველოში“, მოამზადეს ევროპის საბჭოს საპარლამენტო ასამბლეის მონიტორინგის კომიტეტის თანამომხსენებლებმა, ედიტ ესტრელამ და საბინა ჩუდიჩმა.

ავტორები წერენ, რომ საქართველოში დემოკრატიული უკუსვლა გრძელდება, ისევე როგორც ზეწოლა სამოქალაქო საზოგადოებაზე, ოპოზიციასა და განსხვავებულ აზრზე. ისინი აღნიშნავენ, რომ ევროპის საბჭოს საპარლამენტო ასამბლეის არცერთი რეკომენდაცია, რომელიც სასწრაფო განხორციელებას მოითხოვს, არ შესრულებულა.

ანგარიშში აღნიშნულია, რომ ეს ეჭვქვეშ აყენებს საქართველოს ხელისუფლების მზაობას, შეასრულოს ევროპის საბჭოში საქართველოს წევრობით გამოწვეული ვალდებულებები.

ავტორებმა ხაზგასმით აღნიშნეს, რომ ასამბლეა ერთგულია „ღია და შედეგებზე ორიენტირებული“ დიალოგისა როგორც თბილისთან, ასევე ოპოზიციასთან და სამოქალაქო საზოგადოებასთან.

ანგარიშში ნათქვამია, რომ „ინიციატივა, რომელიც ეფექტურად კრძალავს საქართველოში თითქმის ყველა დემოკრატიულ ოპოზიციურ პარტიას და ადანაშაულებს მათ ლიდერებს პოლიტიკურად მოტივირებული და შეთითხნილი ბრალდებებით, მიუღებელია“.

დოკუმენტში ნათქვამია, რომ თუ საქართველოს ხელისუფლება ამ კურსს გააგრძელებს, ასეთი ქმედებები ერთპარტიული დიქტატურის დამყარებას გამოიწვევს, რაც მოქალაქეთა ფუნდამენტურ უფლებებსა და დემოკრატიის პრინციპებს დაარღვევს და შეუთავსებელია საქართველოს ევროპის საბჭოში წევრობასთან.

„ასამბლეა მოითხოვს, რომ საქართველოს ხელისუფლებამ დაუყოვნებლივ გაიწვიოს საკონსტიტუციო სასამართლოში შეტანილი სარჩელი დემოკრატიული ოპოზიციური პარტიების აკრძალვასთან დაკავშირებით და შეწყვიტოს მათი ლიდერების უსამართლო და პოლიტიკურად მოტივირებული სისხლისსამართლებრივი დევნა“, - ნათქვამია ანგარიშში.

ასამბლეა მოუწოდებს საქართველოს ხელისუფლებას, დაიწყოს ღია და ინკლუზიური პოლიტიკური პროცესი ყველა პოლიტიკური ძალისა და სამოქალაქო საზოგადოების დაინტერესებული წარმომადგენლების მონაწილეობით, რათა „აღდგეს ქვეყანაში ჭეშმარიტად თავისუფალი და დემოკრატიული პოლიტიკური გარემო, ქართული საზოგადოების მკაფიოდ გამოხატული მოლოდინებისა და მისწრაფებების შესაბამისად“.

გარდა ამისა, რეზოლუციის პროექტში ნათქვამია, რომ „გამოხატვისა და შეკრების თავისუფლების შეზღუდვები, მათ შორის რეპრესიული კანონმდებლობისა და სამოქალაქო საზოგადოების, დამოუკიდებელი მედიის, ოპოზიციური ძალებისა და ინდივიდუალური მომიტინგეების წინააღმდეგ სამართლებრივი მექანიზმების ბოროტად გამოყენების გზით, დაუყოვნებლივ უნდა შეწყდეს“. ამ კონტექსტში ნახსენებია ნიკა მელია და ელენე ხოშტარია.

ავტორი: ექსპრესნიუსი,

სოციალური ქსელები

საქართველოს ბანკის YouTube პროექტის - CREATOR-ის მეორე სეზონი იწყება

„შავი პარასკევი“ „მაზდა ცენტრი თეგეტაში“ - ბრენდის ყველაზე მოთხოვნად მოდელებზე 20%-მდე ფასდაკლება 1-ელი ნოემბრიდან იწყება

დათუნაშვილი - გაზის გაძვირება კატასტროფული გადაწყვეტილება, რომელიც ძალიან მძიმე ტვირთად დააწვება თითოეულ ოჯახს ამ ქვეყანაში

მეუფე ვახტანგი სამორინეებზე - როგორმე, პარლამენტში ხელახლა უნდა გავიდეს და დააიგნორონ