აშშ-ის სენატორების ორპარტიულმა ჯგუფმა თავდაცვის მინისტრ პიტ ჰაგსეთს წერილი გაუგზავნა, რომელშიც უკრაინისა და ბალტიისპირეთის ქვეყნებისთვის 600 მილიონი დოლარის სამხედრო დახმარებას ითხოვდა.

ამის შესახებ Associated Press იტყობინება.

600 მილიონი დოლარიდან 400 მილიონი უკრაინისთვისაა განკუთვნილი, ხოლო დარჩენილი 200 მილიონი ესტონეთის, ლატვიისა და ლიეტუვის თავდაცვის პროგრამებისთვის. კონგრესმა ეს თანხები გასულ წელს გამოყო.

წერილს ხელი მოაწერეს დემოკრატებმა დიკ დურბინმა, მაიკლ ბენეტმა და კეტრინ კორტეს მასტომ, ასევე რესპუბლიკელებმა ჩაკ გრასლიმ, კევინ კრამერმა და ტომ ტილისმა.

„უკრაინამ მტკიცედ და გაბედულად მოიგერია რუსეთის ოთხი წლის აგრესია, მაგრამ მის სამხედრო ძალებს სჭირდება და იმსახურებს ამერიკის მხარდაჭერის გაგრძელებას“, - ნათქვამია წერილში.

სამ კვირაზე მეტი ხნის წინ კონგრესის სხდომაზე ჰაგსეთმა განაცხადა, რომ უკრაინის დაფინანსება „განიხსნა“ და ხარჯების გეგმა მალე გაეგზავნება კანონმდებლებს. თუმცა, პენტაგონმა 15 მაისის დაპირებული ვადა ვერ შეასრულა.

„ნებისმიერი შემდგომი შეფერხება, განსაკუთრებით თავდაცვის დეპარტამენტის მიერ რეგიონიდან აშშ-ის ჯარების გაყვანის გეგმების გათვალისწინებით, ძირს უთხრის რუსეთის შეკავების ჩვენს შესაძლებლობას“, - მიაჩნიათ სენატორები.

შეგახსენებთ, რომ საქმე ეხება უკრაინის უსაფრთხოების დახმარების ინიციატივის (USAI) 400 მილიონი დოლარის ოდენობის პაკეტს, რომელიც ითვალისწინებს პენტაგონის მიერ ამერიკული თავდაცვის კომპანიებისგან აღჭურვილობის შეძენას. ეს ასიგნება შეტანილი იყო ეროვნული თავდაცვის ავტორიზაციის აქტში, რომელიც კონგრესმა 2025 წლის დეკემბერში დაამტკიცა.

აშშ-ის სახელმწიფო დეპარტამენტმა ცოტა ხნის წინ დაამტკიცა უკრაინისთვის Hawk-ის არსებული საჰაერო თავდაცვის სისტემების მოვლა-პატრონობისთვის აღჭურვილობის პოტენციური გაყიდვა, რომლის საერთო ღირებულება 108.1 მილიონი დოლარია.

ავტორი: ექსპრესნიუსი,

სოციალური ქსელები

ტრამპმა ლიეტუვას მოსთხოვა, ევროკავშირის სანქციების გვერდის ავლის მიზნით, ბელარუსული კალიუმის ექსპორტისთვის პორტი გაეხსნა

სოციალური სამართლიანობის ცენტრი - საარსებო შემწეობის მიმღებთა რაოდენობის მკვეთრი კლება არაერთ კითხვას აჩენს

კობახიძე აზარტული თამაშების საერთაშორისო ტურნირთან დაკავშირებულ კანონზე - ეს არ არის განსაკუთრებული მნიშვნელობის მქონე კანონპროექტი

რუსეთის მიერ ოკუპირებული ოლეშკადან ხალხის ევაკუაცია დაიწყო