უნგრეთის მმართველმა პარტია "ტისამ" პარლამენტში საკონსტიტუციო ცვლილების პროექტი წარადგინა, რომლის თანახმადაც, პრემიერმინისტრს მაქსიმუმ რვა წლის განმავლობაში შეეძლება თანამდებობის დაკავება, ანუ, ორი ვადით. ეს ცვლილება ფაქტობრივად გამორიცხავს ყოფილი პრემიერის ვიქტორ ორბანის თანამდებობაზე დაბრუნებას.

პრემიერმინისტრმა პიტერ მადიარმა, რომელმაც აპრილში გამართულ არჩევნებში 16-წლიანი მმართველობის შემდეგ დაამარცხა ვიქტორ ორბანი, განაცხადა, რომ გეგმავს პარლამენტში არსებული საკონსტიტუციო უმრავლესობის გამოყენებას ვიქტორ ორბანის პარტია "ფიდესის" მიერ მიღებული კანონებისა და კონსტიტუციის გადასახედად, რათა "დემოკრატიული კონტროლისა და ბალანსის სისტემა აღდგეს".

უნგრეთის პარლამენტის ვებ-გვერდზე გამოქვეყნებული საკონსტიტუციო ცვლილების პროექტის მიხედვით, პირი, რომელსაც პრემიერმინისტრის პოსტი ჯამში მინიმუმ 8 წლის განმავლობაში ეკავა, "ვეღარ იქნება არჩეული პრემიერმინისტრად". ეს წესი გავრცელდება 1990 წლის 2 მაისის შემდეგ დაკავებული პრემიერმინისტრების ვადებზე. 

პროექტში ასევე წერია, რომ პრემიერმინისტრს თანამდებობის დატოვება მოუწევს მაქსიმუმ რვა წლის, ანუ ორი ვადის შემდეგ.

ცვლილება ასევე ითვალისწინებს "სუვერენიტეტის დაცვის ოფისის" გაუქმებას - ეს უწყება ვიქტორ ორბანმა 2023 წელს შექმნა. მას ჰქონდა უფლება, ქვეყნის სუვერენიტეტისთვის საფრთხედ მიჩნეული მედიასაშუალებები აღერიცხა და გამოეძიებინა "ქვეყნის სუვერენიტეტისთვის საფრთხის შემცველი საქმიანობა".

ავტორი: ექსპრესნიუსი,

სოციალური ქსელები

დრონებმა რუსეთის ვოლგოგრადისა და სამარის რეგიონებს შეუტიეს, ნავთობგადამამუშავებელ ქარხანას ცეცხლი გაუჩნდა

ნატოს გამანადგურებლებმა ლიეტუვის საზღვრის დარღვევის გამო დრონი ჩამოაგდეს

FT: პუტინს არ სურს ტრამპის მიერ უკრაინასთან გამოცხადებული ენერგეტიკული ზავის დადება

ზელენსკი თანახმაა არ დაარტყას რუსეთის ენერგეტიკას, თუ რუსეთი შეწყვეტს უკრაინის ენერგეტიკულ ობიექტებზე, საწყობებსა და პორტებზე თავდასხმას