უკრაინის პრეზიდენტმა, ვოლოდიმირ ზელენსკიმ, „Sky News-თან“ ინტერვიუში განაცხადა, რომ რუსეთის ლიდერი ვლადიმერ პუტინი პოლიტიკური იზოლაციიდან გამოსავალს ეძებს და ცდილობს, აშშ-ის პრეზიდენტი დონალდ ტრამპი მოატყუოს, რათა ახალი სანქციები თავიდან აიცილოს.

ჟურნალისტის შეკითხვაზე, მიიჩნევს თუ არა შეცდომად აგვისტოში ალასკაზე გამართულ რუსეთისა და ამერიკის ლიდერების სამიტს, ზელენსკიმ უპასუხა: „ვფიქრობ, მან ბევრი რამ მისცა პუტინს. მჯერა, რომ სამმხრივი შეხვედრის შემთხვევაში, გარკვეულ შედეგს მივიღებდით“.

მისი შეფასებით, პუტინს „ალასკის სამიტით პოლიტიკური იზოლაციიდან თავის დაღწევა სურდა“, თუმცა აშშ-ის პრეზიდენტთან შეხვედრისთვის „მეტი უნდა გადაეხადა“.

„ამ ომში მას მარცხი უნდა ეგრძნო და გაჩერებულიყო, მაგრამ ამის ნაცვლად, დეიზოლაცია მიიღო. მიიღო ფოტოები პრეზიდენტ ტრამპთან, მიიღო საჯარო დიალოგი და ვფიქრობ, ეს პუტინს სხვა სამიტებსა და ფორმატებში მონაწილეობის კარს უხსნის, რადგან ასეა საქმე. ჩვენ ამას ვხედავთ, ვაკვირდებით და არ მგონია, რომ მან ამისთვის რამე გადაიხადა“, — განაცხადა ზელენსკიმ.

მისი თქმით, პუტინმა უნდა გადაიხადოს, პირველ რიგში, იმიტომ, რომ ომი მან დაიწყო და მეორეც, იმიტომ, რომ ცდილობს იზოლაციიდან გამოსავლის პოვნას.

„ის ომს აწარმოებს და ყველა ცდილობს მის შეჩერებას კამათით, თხოვნით, მაგრამ ამის ნაცვლად ძალა უნდა გამოიყენონ. მას ესმის ძალა, ეს მისი ენაა, ის ბევრ ენაზე არ საუბრობს, მაგრამ ესმის ძალის ენა, ისევე როგორც რუსული. ჩვენ ძალიან ვთხოვთ ევროპისა და აშშ-ის ქვეყნებს, ეს გააკეთონ. დიახ, ისინი გარკვეულ ნაბიჯებს დგამენ, მაგალითად, სანქციებს, მაგრამ მეტი და უფრო სწრაფად უნდა გაკეთდეს“, — აღნიშნა ზელენსკიმ.

უკრაინის პრეზიდენტმა დადებითად უპასუხა შეკითხვას, ცდილობს თუ არა პუტინი ტრამპის მოტყუებას.

„ის ყველაფერს აკეთებს სანქციების თავიდან ასაცილებლად, რათა აშშ-მა და ტრამპმა მას სანქციები არ დაუწესონ. თუ სანქციების დაწესებას კიდევ უფრო გადადებთ, მაშინ რუსები უკეთ მომზადებულები იქნებიან“, — დასძინა ზელენსკიმ.

ავტორი: ექსპრესნიუსი,

სოციალური ქსელები

გერმანიაში, სამხედრო აეროდრომის მახლობლად, უცნობი დრონის ნამსხვრევები იპოვეს

ნატო: რუსეთმა მოკავშირეების დაშინება დანიური ვერტმფრენის მიმართულებით ცეცხლსასროლი იარაღის სროლით სცადა

ტრამპ უმცროსის მეუღლემ დაადასტურა, რომ პუტინის დაცვის უფროსის მეგობარმა აშშ-ის პრეზიდენტის შვილის ქორწილი დააფინანსა

ოცნების 14-მა ე.წ დეპუტატმა ტელეფონის სქროლისას ვერ შეამჩნიეს, როგორ დაუჭირეს მხარი გახარიას პარტიის ინიციატივას