საქართველოს გენერალურ პროკურატურაში თანაინვესტირების ფონდის ყოფილი ხელმძღვანელის, გიორგი ბაჩიაშვილის მიმართ ბრალის წარდგენის პროცედურა მიმდინარეობს.

როგორც უწყებაში შესვლამდე ბაჩიაშვილმა განმარტა, მას ბრალს „მტკვარი ჰესის“ საქმეზე წაუყენებენ.

ის მიიჩნევს, რომ მის წინააღმდეგ ახალი საქმე ბიძინა ივანიშვილის მიერ დაანონსებული მუქარის ნაწილია.

„მიმდინარე საქმის ჩემი გამომძიებელი გუშინ დამიკავშირდა, რომელმაც მაცნობა, რომ პროკურატურაში „მტკვარი ჰესის“ საქმეზე ბრალის წარდგენაზე გამოვცხადებულიყავი. ეს არის მეორე ფაბრიკაცია, რომელიც ივანიშვილმა სასამართლოში თავის ჩვენებისას დამიანონსა, რომ დამატებით სისხლის სამართლის დევნა იქნებოდა, ეს ჩემთვის არც სიახლე და არც მოულოდნელობა არ იყო. ივანიშვილს თავის თავი კიდევ ერთხელ უფრო მძიმე მდგომარეობაში შეჰყავს, რადგან ერთ უსაფუძვლო საქმეს მეორე უსაფუძვლო საქმეს ამატებს, რაც ევროსასამართლოსთვის კიდევ დამატებითი მტკიცებულება იქნება, რომ ეს პირადი ანგარიშსწორებაა პოლიტიკური ანგარიშსწორების მქონე პირის მხრიდან, რომ გამომძალოს დიდი თანხა და დამსაჯოს იმისთვის, რომ მისი თანამონაწილე არ გავხდი იმ ანტიდასავლურ საქმეებში, რასაც ის სჩადის.

„მტკვარი ჰესის“ საქმეში ივანიშვილის წერილი შევიდა პროკურატურაში, ის ამბობს იმას, რომ „მტკვარი ჰესის“ ბიუჯეტი გაიზარდა და ალბათ, ბაჩიაშვილმა ფული მოიპარაო, არც მტკიცებულება, არც რამე დოკუმენტი საქმეში არ იდო. თანაინვესტირების ფონდს „მტკვარჰესთან“ ერთად მართავდა რამდენიმე პროექტს, ეს ფონდი დასავლური პრაქტიკით დაფუძნებული იყო და ყველა გადაწყვეტილება, რომელიც ფონდში მიიღებოდა, საბჭოს მიერ მიიღებოდა, ეს გადაწყვეტილებები „მტკვარი ჰესს“ მიეწოდებოდა და ის აღასრულებდა ამ გადაწყვეტილებებს. „მტკვარი ჰესში“ დასავლური საინჟინრო კომპანიები იყვნენ ჩართული, რომლებიც ტენდერულ დოკუმენტებს აწარმოებდნენ. იდეაშიც კი, მე, როგორც დირექტორს, რამე უკანონობის ჩადენა რომ მდომებოდა, უფლებამოსილება არ მქონდა. მიუხედავად იმისა, რისი უფლება მქონდა და არა, „მტკვარი ჰესში“ არც ერთი უკანონო გადაწყვეტილება არ მიღებულა.

ამ ეტაპზე არ ვიცი, რა მუხლი შეიძლება წამიყენონ, რადგან არანაირი დანაშაული არ იკვეთება, პროკურატურას საქმის „შესაკერად“ რა დაჭირდება, არ ვიცი“,- განაცხადა ბაჩიაშვილმა.

ავტორი: ექსპრესნიუსი,

სოციალური ქსელები

რუსეთის საგადასახადო სამსახურმა თამარა გვერდწითელის კომპანიის ანგარიშები დაბლოკა

თურქეთმა რუსული ქვანახშირის შესყიდვები შეაჩერა შავ ზღვაში უკრაინის მიერ გემებზე თავდასხმის შემდეგ

ტრამპი 2024 წლის არჩევნებში გამარჯვების შემდეგ 2.7 მილიარდი დოლარით გამდიდრდა

ზელენსკიმ განაცხადა, რომ რუსეთმა ბოლო კვირის განმავლობაში ორჯერ სცადა მისი თვითმფრინავის ჩამოგდება