ჩვენ გვაკავშირებს ხანგრძლივი მეგობრობა საქართველოსთან და როგორც კარგ მეგობრებს სჩვევიათ, ჩვენ ზოგჯერ ერთმანეთს არ ვეთანმებით. - განაცხადა საქართველოში აშშ-ს ელჩმა კელი დეგნანმა.

მისივე თქმით, უნდა ვესაუბროთ ერთმანეთს არსებულ აზრთა სხვადასხვაობაზე.

"ჩვენ გვაკავშირებს ხანგრძლივი მეგობრობა საქართველოსთან და როგორც კარგ მეგობრებს სჩვევიათ, ჩვენ ზოგჯერ ერთმანეთს არ ვეთანმებით. ჩვენ უნდა ველაპარაკოთ ერთმანეთს ამ აზრთა სხვადასხვაობაზე და ამას, როგორც წესი, პირად საუბრებში ვაკეთებთ, რაც ყველაზე ეფექტური საშუალებაა. თუმცა, ზოგჯერ, როდესაც რაიმე მნიშვნელოვანი ხდება, საჯაროდაც ვაკეთებთ განცხადებებს, როგორც ეს ამ შემთხვევაში მოხდა.
ჩვენ გამოვაქვეყნეთ ოფიციალური განცხადება და გამოვთქვით შეშფოთება განაჩენის დროულობასა და ბრალდებებზე. აღსანიშნავია, რომ აშშ არ იყო ერთადერთი, ვინც ასეთი შეშფოთება გამოთქვა. ასეთები იყვნენ სახალხო დამცველი, არასამთავრობო ორგანიზაციები და საქართველოს მეგობრები. ასე რომ, ეს არ მომხდარა ფარულად. ეს მოხდა საჯაროდ და ეს არის ნორმალური, სტანდარტული პრაქტიკა. მიუხედავად ამისა, აგორდა სკანდალი ისეთი რაღაციდან, რაც სრულებით არ არის სკანდალი, არამედ არის რუტინული ქმედება.
აშშ დიდი ხანია მუშაობს საქართველოს მართლმსაჯულების გასაუმჯობესებლად, მისი გამჭვირვალობისა და დამოუკიდებლობისთვის. ეს მოიცავს უამრავ აზრთა გაცვლა-გამოცვლას ამერიკელ ექსპერტებსა და ქართველ მოსამართლეებს, პროკურორებსა და ადვოკატებს შორის. კიდევ ერთხელ ვიმეორებ, რომ ეს რუტინული შეხვედრებია და თუ ვინმეს სურს, რომ აქედან სკანდალი შექმნას, ალბათ ეს პირადი ინტერესებიდან გამომდინარე ხდება. 
მე ვიყავი მესტიაში, ზუგდიდში, უამრავი პოზიტიური შეხვედრა მქონდე ქართველებთან და არ მქონია შესაძლებლობა, რომ თბილისში მიმდინარე მოვლენებისთვის თვალი მედევნებინა. ეს საქართველოს რეგიონებში მოგზაურობის ერთ-ერთი დიდი პლიუსია. ასე რომ, მე არ ვიცი, რაზეა საუბარი. მე ვერ დავადასტურებ ვიღაცის ჭორებს". - ნათქვამია განცხადებაში.

შეგახსენებთ, რომ ბოლო დღეების განმავლობაში "ქართული ოცნების" ლიდერები მიზანმიმართულად ცდილობენ საქართველოში აშშ-ს ელჩის კელი დეგნანის დისკრედიტაციას, ასევე აღსანიშნავია მმართველი პარტიიდან წასული სამი დეპუტატის - ხუნდაძის, ყაველაშვილისა და სუბარის განცხადებები, რომელიც ასევე მიმართულია ევროინტეგრაციის დისკრედიტაციისკენ.

ავტორი: ექსპრესნიუსი,

სოციალური ქსელები

ტრამპი ცდილობს, უკრაინა კაპიტულაციაზე აიძულოს, — The Atlantic

ფინეთმა ევროკავშირს შესთავაზა, რომ ომის დასრულებამდე რუსებისთვის ტურისტული ვიზების სრული აკრძალვა დაწესდეს

ნატომ პირობა დადო, რომ რუსეთის თავდასხმის შემთხვევაში, თავდამსხმელის ძალები სრულად განადგურდება

EU-მ რუსეთის სამხედრო-სამრეწველო კომპლექსის წინააღმდეგ სანქციების უპრეცედენტო პაკეტი დაამტკიცა