ირაკლი ღარიბაშვილი - ვიცი, რომ დღეს ჯერ კიდევ გამოწვევად რჩება მორატორიუმი მცხეთის ტერიტორიაზე, ამ მიმართულებით ვმუშაობთ, კიდევ უფრო მეტად გავააქტიურებთ მუშაობას და ძალიან მალე იქნება მიღებული გადაწყვეტილება

2021-09-10 20:46:44, 585 ნახვა

პოლიტიკა

ჩვენ გვაქვს ძალიან ამბიციური, მასშტაბური გეგმები ინფრასტრუქტურის განვითარების მიმართულებით; გზების მშენებლობა, ხიდების მშენებლობა იქნება თუ სხვა, ჩვენ მაქსიმუმ 10 წლის განმავლობაში გვაქვს გაწერილი გეგმა, რომ 32 მილიარდი ლარის ინვესტიცია განხორციელდება, - ამის შესახებ საქართველოს პრემიერ-მინისტრმა ირაკლი ღარიბაშვილმა „ქართული ოცნების" მცხეთის მერობის კანდიდატის, დიმიტრი ზურაბიშვილის წარდგენისას განაცხადა.

მთავრობის მეთაურის თქმით, მცხეთის მუნიციპალიტეტში ძალიან ბევრი პროექტი განხორციელდა, იქნებოდა ეს სკოლების, ბაღების მშენებლობა, გზების მოწყობა, სპორტული კომპლექსის მშენებლობა, საცურაო აუზი და ა.შ. თუმცა, ეს არ არის საკმარისი და კიდევ მეტი, უფრო მეტი ამბიციური გეგმები განხორციელდება.

„ჩვენ დღეს დავათვალიერეთ მაგალითად ქვეშეთი-კობის გვირაბის მშენებლობა, რომელიც მართლაც არის უნიკალური. ეს არის 9-კილომეტრიანი გვირაბი, რომლის მშენებლობა დღეს დავიწყეთ უკვე და დასრულდება სულ რაღაც 2 წელიწადში. ეს ძალიან გააადვილებს გადაადგილებას ჩვენი მოქალაქეებისთვის, ტურისტებისთვის. მოგეხსენებათ, რომ ამ მონაკვეთზე ათასობით მანქანა გადაადგილდება დღის განმავლობაში - 3-4 ათასი მანქანა და არის ძალიან გართულებული მით უმეტეს ზამთრის პირობებში. 100 დღის განმავლობაში იკეტებოდა მანამდე ეს გზა. ამ პროექტის განხორციელების შემდეგ, თბილისიდან ყაზბეგში ჩასვლა შეგვეძლება სულ რაღაც საათ-ნახევარში. ასევე, ჩვენ ვგეგმავთ, რომ ნატახტარი-ჟინვალის მონაკვეთის მშენებლობაც ძალიან მალე დავიწყოთ. გუდაურში თბილისიდან ჩავალთ 1 საათში და გუდაურს გარდავქმნით რეალურად თანამედროვე ევროპული ტიპის კურორტად. ვიცი, რომ დღეს ჯერ კიდევ გამოწვევად რჩება მორატორიუმი მცხეთის ტერიტორიაზე. ჩვენ ამ მიმართულებით ვმუშაობთ. კიდევ უფრო მეტად გავააქტიურებთ მუშაობას და ძალიან მალე იქნება მიღებული გადაწყვეტილება. ამ ყველაფერს სჭირდება მშვიდობა და სტაბილურობა. ჩვენი ხელისუფლება „ქართული ოცნება" არის ის, დღეს ყოველ შემთხვევაში, ერთადერთი პასუხისმგებლიანი პოლიტიკური ძალა, რომელმაც თავისი საქმით, თავისი გონივრული, პრაგმატული პოლიტიკით შეძლო სიტუაციის დეესკალაცია, ვითარების დასტაბილურება და ჩვენი ქვეყნის მშვიდობიანი მართვა და მშვიდობიანი განვითარება", - განაცხადა პრემიერმა.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),