ნატოს შტაბ-ბინაში თავდაცვის ძალების მეთაურების დონეზე ნატოს სამხედრო კომიტეტის სხდომის ფარგლებში საქართველოს თავდაცვის ძალების მეთაურმა, გენერალ-მაიორმა გიორგი მათიაშვილმა უცხოელ კოლეგებთან ორმხრივი შეხვედრები გამართა.

აღნიშნულ ინფორმაციას თავდაცვის სამინისტრო ავრცელებს.

უწყების ცნობით, საქართველოსა და შავი ზღვის რეგიონში არსებული უსაფრთხოების გარემო, საქართველოს თავდაცვის ტრანსფორმაცია, ნატო-საქართველოს თანამშრომლობის მექანიზმები, მათ შორის ნატო-საქართველოს არსებითი პაკეტის (SNGP) იმპლემენტაციაში თურქეთის, პოლონეთისა და რუმინეთის ჩართულობა და ამ ქვეყნებთან ორმხრივი სამხედრო თანამშრომლობა, ასევე ერთობლივი მონაწილეობა საერთაშორისო წვრთნებსა და სწავლებებში - ის ძირითადი საკითხები იყო, რაც გენერალ-მაიორმა გიორგი მათიაშვილმა თურქეთის, პოლონეთისა და რუმინეთის თავდაცვის ძალების მეთაურებთან ერთად განიხილა. შეხვედრებზე ხაზი გაესვა მეგობარი ქვეყნების პირველი სამხედრო პირების მხრიდან საქართველოს პოლიტიკურ მხარდაჭერასა და სამომავლო თანამშრომლობის გაღრმავების მნიშვნელობას.

მათივე ინფორმაციით, გენერალ-მაიორმა გიორგი მათიაშვილმა თურქ კოლეგას, გენერალ იაშარ გულერს საქართველოსთან მჭიდრო თანამშრომლობისა და ათწლეულების მანძილზე თავდაცვის ძალების განვითარებაში გაწეული დახმარებისთვის მადლობა გადაუხადა და ყურადღება გაამახვილა სამხედრო სწავლებაში მონაწილეობაზე, რაც მნიშვნელოვნად ზრდის საბრძოლო მზადყოფნას და მხარს უჭერს საქართველოსა და თურქეთის თავდაცვის ძალების ურთიერთქმედებას.

როგორც გავრცელებულ ინფორმაციაშია აღნიშნული, საქართველოს თავდაცვის ძალების მეთაურმა პოლონელ და რუმინელ კოლეგებთან, გენერალ რაიმუნდ ანდჟეიჟაკთან და გენერალ-ლეიტენანტ დანიელ პეტრესკუსთან საუბრისას ხაზი გაუსვა პოლონეთისა და რუმინეთის ჩართულობას საქართველოში ევროკავშირის სადამკვირვებლო მისიაში, ასევე საქართველოში ჩატარებული საერთაშორისო წვრთნებში მონაწილეობის და თავდაცვის ძალების სპეციალური ოპერაციების ძალების შესაძლებლობების განვითარებისათვის კონტრიბუციის მნიშვნელობას. რუმინეთის თავდაცვის ძალების მეთაურთან შეხვედრაზე ხაზი გაესვა საქართველოსა და რუმინეთის სპეციალური ოპერაციების ძალებს შორის ჩამოყალიბებულ მჭიდრო პარტნიორულ ურთიერთობებს, ხოლო პოლონეთის გენერალური შტაბის უფროსთან შეხვედრაზე გენერალ-მაიორმა გიორგი მათიაშვილმა ხაზი გაუსვა პოლონეთის პრაქტიკულ მხარდაჭერას თავდაცვის ძალების სამხედრო პოლიციის შესაძლებლობების განვითარებაში.

ავტორი: NS (სტატია დაფინანსებულია),

სოციალური ქსელები

დუმამ ბალტიისპირეთის ქვეყნები სსრკ-დან გამოყოფის შესახებ შეთანხმების დარღვევაში დაადანაშაულა

კობახიძე ერევანში ევროპული პოლიტიკური გაერთიანების (EPC) მე-8 სამიტში მონაწილეობისთვის ჩავიდა

რა მეთოდები გამოიყენება ჟურნალისტებისა და მედიის დისკრედიტაციისთვის

რეჟიმის მიერ წნეხში მოქცეული ქართული მედია - როგორ ხვდება ოცნების პირობებში პრესის თავისუფლების დღეს საქართველო