საქართველოში არსებული კერძო სანერგე მეურნეობების ოცზე მეტი წარმომადგენელი მონაწილეობდა FAO-ს მიერ ორგანიზებულ სამდღიან ვებინარში, ევროკავშირის ინოვაციური პროექტის ფარგლებში, რომელიც საქართველოში კერძო სექტორის კონკურენტუნარიანობის გაუმჯობესებას გულისხმობს.

ონლაინ ტრენინგის ფარგლებში, მონაწილეებმა  მაღალი ხარისხის, სერტიფიცირებული ნერგების წარმოების სტანდარტები შეისწავლეს და საქართველოში სანერგე მასალების სერტიფიცირების ეროვნული სისტემის შექმნაზე იმსჯელეს.

ტრენინგის ფარგლებში, ყურადღება გამახვილდა  კრიტერიუმებზე, რომელთა მიხედვით, ქართული სანერგე წარმოება საერთაშორისო სტანდარტებსა და საუკეთესო ევროპულ პრაქტიკებს უნდა დაუახლოვდეს. ეს განსაკუთრებით მნიშვნელოვანია, რადგან ევროკავშირთან ასოცირების შეთანხმების ფარგლებში, ხარისხის ახალი სტანდარტები სავალდებულო გახდება საქართველოს სანერგე მეურნეობებისთვის 2024 წლიდან.

ახალი მოთხოვნები ასევე დაარეგულირებენ იმპორტ-ექსპორტს და სექტორში საკანომდებლო სტაბილურობას შექმნიან, განსაკუთრებით, ცუდი ხარისხის ნერგების იმპორტის თავიდან ასაცილებლად. ასევე, ახალი რეგულაციები გზას გაუხსნიან ქართულ სანერგე მეურნეობებს პროდუქციის ევროკავშირის და სხვა ქვეყნების ბაზარზე გასატანად.

ვებინარის ფარგლებში, სანერგე მეურნეობების წარმომადგენლებმა „ნერგებისა და სათესლე მასალების ასოციაციის“ შექმნაზე, ასევე, თანამშრომლობისა და კლასტერული მუშაობის გაძლიერებაზე იმსჯელეს.

შეხვედრის გახსნისას, FAO-ს პროექტის მენეჯერმა, ნუნუ მოსიაშვილმა განაცხადა: „საქართველოს ფერმერებისთვის სასიცოცხლოდ მნიშვნელოვანია ხილისა და ყურძნის ადგილობრივად წარმოებული, სერტიფიცირებული ნერგების შეძენა. მხოლოდ ამ შემთხვევაში შეეძლებათ ფერმერებს, დარწმუნებულნი იყვნენ, რომ მათ მიერ შეძენილი და გამოყენებული სანერგე მასალები მართლაც მაღალი ხარისხისაა. FAO და ევროკავშირი ადგილობრივი სანერგე მეურნეობების მხარდაჭერას აგრძელებენ, რათა მათ პროდუქციის ხარისხი გააუმჯობესონ და  საერთაშორისო სტანდარტები დააკმაყოფილონ“.

ეს ვებინარი პირველია დაგეგმილი სერიიდან, რომელიც მიზნად ისახავს სანერგე მეურნეობების წარმომადგენლების დატრენინგებას სანერგე და სასათბურე მეურნეობების მართვის მიმართულებით, მავნებლების მონიტორინგისა და გავრცელების კონტროლის კუთხით, ნერგების ჯიშობრივი სიწმინდის შენარჩუნებისა და იდენტიფიკაციის, ასევე, სანერგე მეურნეობებთან დაკავშირებული დოკუმენტაციებისა და ჩანაწერების წარმოების მიმართულებით.

ვებინარები ორგანიზებულია FAO-ს მიერ, „ევროკავშირის ინოვაციური პროექტი საქართველოში კერძო სექტორის კონკურენტუნარიანობისთვის“ ფარგლებში. პროექტს FAO და გაეროს სხვა სააგენტოები, კერძო სექტორთან და ბიზნეს ასოციაციებთან ერთად, ევროკავშირის დაფინანსებით ახორციელებენ. პროექტის მთლიანი ბიუჯეტი 6 მილიონ დოლარს აღწევს.

პროექტი საქართველოს ბიზნესის უფრო ფართო ხელშეწყობის EU4Business ნაწილია, რომლის ფარგლებში ევროკავშირი ხელს უწყობს ქართულ მეწარმეობას, საკანონმდებლო ველის გაუმჯობესებას, ფინანსებზე ხელმისაწვდომობის გაზრდას და ევროკავშირთან თანამშრომლობის განმტკიცებას.   

ავტორი: NS (სტატია დაფინანსებულია),

სოციალური ქსელები

ბერნჰემი: რუსეთი ჩაერია დიდი ბრიტანეთის ევროკავშირიდან გასვლის შესახებ რეფერენდუმში

FT: კრემლმა ევროპული თავდაცვის კომპანიების ტოპ მენეჯერებზე ნადირობა გამოაცხადა

ზელენსკიმ განაცხადა, რომ მზადაა ქვეყანაში არჩევნები ჩაატაროს, თუ პუტინი 60-დღიან ცეცხლის შეწყვეტას დათანხმდება

უკრაინის დარტყმებს შესაძლოა Yandex-ის სამივე სუპერკომპიუტერი გამოეყენებინა